قازاقتىڭ تويى ارقىلى اتى شىققان انشىلەر كىمدەر؟ - فوتو

استانا. قازاقپارات - قازاق تويى كوپتەگەن انشىلەردى اسىراپ وتىرعانى جاسىرىن ەمەس. جۇلدىزداردىڭ نەگىزگى تابىسى وسى تويدان تۇسەدى.

ۇلكەن ونەرگە وقۋ وقىپ، انشىلىك ونەردىڭ جىلىگىن شاعىپ، مايىن ءىشىپ، كانىگى مايتالمانداردان رۇقسات الىپ ەمەس، تويدان باتا الىپ كەلگەندەر قازاق ەستاراداسىندا جەتىپ ارتىلادى. توي ارقىلى باعى جانعان انشىلەر توپتاماسىن NUR. KZ ارنايى دايارلادى.

زاتتىبەك كوپبوسىن ۇلى

ۇلكەن ساحناعا 2007 -جىلى شىعا باستاعان. بۇعان دەيىن كىشىگىرىم توي- تومالاقتاردا ءان ايتىپ ءجۇرىپ، شىمكەنت مۋزىكا مەكتەبىندە ۇستازدىق قىزمەت اتقارعان. «نەمەرەمە» جانە «اقمارجان» اندەرى ونى حالىق الدىنا الىپ كەلدى.

ەرنار ايدار

ماماندىعى - زاڭگەر. ەڭ العاشقى ءانى اكەسىنىڭ مەرەيتويىنا ارنالىپ جازىلعان. قازىرگى تاڭدا 90 عا جۋىق ءانى بار. ولاردىڭ دەنى توي- تومالاقتاردا ايتىلادى. ەرنار ايدار وسى ۋاقىتقا دەيىن بىرنەشە جەكە كونسەرتىن بەرىپ ۇلگەرگەن. قازىر ونىڭ «عاشىقپىن» ءانى دە تويلارعا كورىك بەرىپ ءجۇر.

اباي بەگەي

اباي بەگەيدىڭ «اسپانعا قارايمىن» ءانى ناعىز حيتكە اينالعان اباي بەگەيدىڭ باعى دا توي ارقىلى جانعانى جالپاق جۇرتقا بەلگىلى. ودان كەيىن ونىڭ «ءۇربيبى» ، «تاعى تاعى» دەگەن اندەرى دە تويلاردىڭ ءسانى بولدى.

سەرىكبول سايلاۋبەك

2015 -جىلى شىققان، «وي جەڭگە» ءانى اۋىل جەڭگەلەرىنىڭ مەرەيىن «ۇستەم» ەتىپ، بۇكىل قاراپايىم قازاق تويلارىندا ءالى كۇنگە دەيىن ايتىلىپ كەلەدى. سەرىكبول سايلاۋبەك ءوزى دە كىشىگىرىم توي- تومالاقتاردان قالمايدى. سونىمەن بىرگە ول وتكەن جىلى قازاقستاننىڭ اۋىل- اۋىلىنا بارىپ ون ەكى تەگىن كونسەرت بەرگەن.

اسحات تارعىنوۆ

بارشا قازاق بوبەكتەرى بۇدان ءبىر- ەكى جىل بۇرىن «ماريا ماگدالەنا» دەپ اندەتتى. بۇل سول كەزدە قالىڭ ەلگە ءالى تانىلا قويماعان اسحات تارعىنوۆتىڭ ءانى ەدى. ءان قازاق تويلارىندا سانگە اينالىپ، ونى ەڭبەكتەگەن بالادان، ەڭكەيگەن كارىگە دەيىن تىڭدايتىن بولدى. ونىڭ كەزەكتى «ناتالي» ءانى دە تانىمالدىلىققا قاراي قارقىن الىپ كەلەدى.