قازاقتىڭ قانداي برەندى بار
وسى جىلى ەلوردا كۇنىنىڭ قۇرمەتىنە استانادا تەك قانا وتاندىق ونىمدەر ساتىلاتىن «سامعاۋ» ساۋدا ورتالىعى اشىلدى.
الماتىداعى Grand Park ورتالىعىنداعى ونىمدەردىڭ دە باسىم كوپشىلىگى ەلىمىزدىڭ ءوز وندىرىسىنەن بولعاندىعى قۋانتادى. دەمەك، بىزدە ءبىر ساۋدا ورنىن تولىقتاي الاتىن ساۋدا بەلگىلەرى قالىپتاسىپ ۇلگەرگەن. ەندىگى دەمەۋ - حالىقتىڭ ەنشىسىندە. وسى ورايدا قازاقستاندا جاسالىپ قانا قويماي، قازاقتىڭ مەرەيىن وسىرۋگە ۇلەس قوسىپ جۇرگەن برەندتەردىڭ وندىعىن نازارلارىڭىزعا ۇسىنامىز، دەپ جازادى رەسپۋبليكالىق «ايقىن» گازەتى.
داياشىلاردىڭ بارلىعى - قازاق جاستارى
اسحانا دەسە، كوز الدىمىزعا پلاستماسسا ىدىسقا سالىنعان تاماق، كوز تارتارلىق ينتەرەرى جوق، تەك قانا جۇرەك جالعاۋعا ارنالعان جەر ەلەستەيدى. «قاعاناتقا» قاناعات تۇتقان حالىققا ەليتالى اسحانالاردىڭ كوبەيۋى ۇنادى، راس. ولاي دەيتىنىمىز، الماتىدا بيىل اشىلعان «پەرەكۋسيتي»، «بازيليك» سىندى تاماقتانۋ ورىندارى بار. ءبىراق «مادەنيدى» ەرەكشە اتاپ وتىرعان سەبەبىمىز - قازاقىلىق باسىم. داياشىلاردىڭ ءبارى قارا كوزدەرىمىز، مادەنيەتتى ءارى ءار كەلۋشىگە ىلتيپاتپەن قارايدى. باعالارى ادەتتەگى اسحانالاردان ءسال قىمبات. ورتاشا ەسەپپەن ادام باسىنا - 1000-1500 تەڭگە.
«مادەني» اسحانا جەلىسىنىڭ باسقارۋشىسى قۋانىش شوڭبايدىڭ ايتۋىنشا، بۇل اسحانانى اشۋعا قالتاسىنان اقشا جۇمساماعان. ينۆەستورلار وزدەرى سۇرانىپ، قاراجات قۇيعان. «بۇگىندە سالىنعان قارجى كولەمى ميلليون دوللاردان استام. الداعى ۋاقىتتا ينۆەستورلار جالپى كولەمى 5 ميلليون بەرۋگە دايار» دەيدى قۋانىش شوڭباي. تاعامداردى ازىرلەۋگە جەرگىلىكتى ازىق- تۇلىكتەر الىنادى. ازىرگە، بۇل برەند الماتى جانە استانا قالالارىندا عانا. الداعى ۋاقىتتا قازاقستاننىڭ بارلىق قالاسىنان اشۋ جوسپاردا بار. سونىمەن بىرگە دۋباي مەن نيۋ- يورك قالالارىنان فيليالدارى اشىلماق.
Toi Driver - وتە قاجەت قوسىمشا
ۇيالى تەلەفونعا ارنالعان بۇل قوسىمشا بۇگىندە برەندكە اينالىپ كەلەدى. يدەيا اۆتورلارى - 26 جاسار جاندوس تۇرسىنبايەۆ پەن دۋمان مولداحانوۆ اتتى كاسىپكەرلەر. وسى قوسىمشانىڭ كومەگىمەن تويدىڭ ءتۇر- ءتۇرىن وتكىزۋدى تولىقتاي ۇيىمداستىرۋعا بولادى. بارشا قازاقستاندىق ارتيستەر، ۆيزاجيستەر، اسابالار، فوتوگرافتار مەن مەيرامحانا يەلەرىنىڭ بازاسى جاسالعان. سول جەردەن ءوزىڭىزدىڭ تۇرعىلىقتى جەرىڭىز، قاراجاتىڭىزعا بايلانىستى ىزدەپ تابۋعا بولادى. «تاپسىرىس بەرۋشىلەرگە قوسىمشا تەگىن بولىپ قالا بەرەدى. ال تاپسىرىس قابىلداۋشىلارعا الداعى ۋاقىتتا 500 تەڭگە ەتىپ، اقىلى قىلاتىن ويىمىز بار» دەيدى جاندوس پەن دۋمان.
قازاقستاندا جاسالاتىن IT- جوبالاردىڭ 90 پايىزىن شەتەلدىك، سونىڭ ىشىندە ۋكراينالىق ماماندار جاسايدى. ال Toi Driver- ءدى ءوزىمىزدىڭ قازاق جىگىتتەر جاساپ شىققان. قازاقتىڭ تويىن قازاقتان ارتىق كىم بىلەدى؟ جوباعا «بولاشاق» باعدارلاماسىمەن وقىپ كەلگەن جاستار قولۇشىن بەرىپتى.
جوعارى دەڭگەيگە شىققان Sulu سابىنى
ەلىمىزدە ازىرگە جالپى ۇلتتىق دەڭگەيگە شىعىپ، ەۋروپالىق ساپامەن سابىن شىعاراتىن كاسىپورىن ازىرگە وسى عانا. باستاپقىدا 350 مىڭ تەڭگە ينۆەستيتسيا سالىنعان. قازىر سابىننىڭ 25 ءتۇرىن شىعارادى. جاساۋ ءۇشىن سابىن قايناتۋدىڭ وزىندىك ءداستۇرى قالىپتاسقان تۇرىك تەحنولوگياسىن پايدالانادى. جاقىندا عانا «حالال» ستاندارتىنا يە بولعان. برەندتىڭ نەگىزىن قالاۋشى ەرگەن سەيسەبايەۆتىڭ ايتۋىنشا، مەملەكەت بولەتىن سۋبسيديالار مەن باعدارلامالارعا قاتىسىپ، قولداۋ تاۋىپ وتىر. سابىن باعاسى 60-380 تەڭگە ارالىعىندا. ايىنا 50 تونناعا جۋىق سابىن جاسالادى. وتكەن جىلى 2 ميلليوننان استام سابىن ساتىلعان.
ۇلتتىق كيىم تىگەتىن «ەركە- نۇر» شەبەرحاناسى
بۇل تىگىن شەبەرحاناسى 1997 -جىلدان بەرى جۇمىس ىستەپ كەلەدى. كەز كەلگەن كيىمدەرگە تاپسىرىس قابىلدانسا دا، باسىم باعىت ۇلتتىق كيىمدەرگە بەرىلەدى. نەگىزىن قالاۋشى - فاريدا مەرحاميت قىزى. «ەركە- نۇر» جاي اتەلە ەمەس، ءوز الدىنا ۇلكەن كومپانيا. جىلدىق تاپسىرىس كولەمى - 600-1000 كيىم شاماسىندا. ورتاشا باعاسى - 300 مىڭعا جۋىق. قىمبات بولۋ سەبەبىن كومپانياداعىلار ماتا مەن زاتتاردىڭ ساپاسىمەن، تولىقتاي قولدان تىگىلگەنىمەن بايلانىستىرادى.
قازاقتىڭ «قۇراق كورپەسى»
قۇراق قۇراۋ - شىدامدىلىققا تاربيەلەپ قانا قويماي، ىسىراپقورلىقتان ساقتاۋعا تاپتىرماس ءادىس. اتا- سالتتى ساقتاپ، قۇراق كورپەنى زاماناۋي ۇلگىدە جاسايتىن «قۇراق كورپە» كومپانياسىن ءبىرى بىلسە، ءبىرى بىلمەس.
فەشن- يندۋسترياعا، ديزاين سالاسىنا مۇلدەم قاتىسى جوق جانار شورايەۆا تاۋەكەلگە بەل بۋىپ، 2013 -جىلى كاسىبىن باستاعان. كەيىن ماماندارمەن بىرلەسىپ جاساۋعا كىرىسەدى. ونىمدەرىن بايىرعى بۇيىمداردىڭ كوشىرمەسى دەگەننەن گورى، قازىرگى زامانعى ينتەرپرەتاتسياسى دەگەن دۇرىس بولار. قۇراق كورپەدەن بولەك، «اينالايىن» ، «جانىم» سەكىلدى پرينتتەرى بار جاستىقتار جاسايدى. كورپەشەنىڭ باعاسى 10-20 مىڭ تەڭگە شاماسىندا. سومكە جانە سول سياقتى اكسەسسۋارلاردى 5-18 مىڭ تەڭگەگە ساتىپ الۋعا بولادى.
وتاندىق بەينەباياندار كورسەتەتىن ارنا
تەك قانا قازاق ورىنداۋشىلارىن، وتاندىق انشىلەردىڭ بەينەباياندارىن كورسەتەتىن جالعىز تەلەارنا بار. ول - «گاككۋ ت ۆ». 2014 -جىلى اشىلىپ، ەلگە تاراي باستادى. «كانالدا كۇنىنە 500-دەن استام بەينەبايان كورسەتىلەدى. جانە ءبىر ەرەكشەلىگى - روتاتسيا ءۇشىن اقى الىنبايدى. ەگەر كليپتى ءجيى كورسەتكەنىن قالاعان جاعدايدا عانا اقىسى ءۇشىن كەلىسۋگە بولادى» دەيدى ارنانىڭ نەگىزىن سالۋشى سانجار مۇستافين.
بۇل ارنا - ارتيستەردەن اقشا المايتىن ازىرگە جالعىز بيزنەس- مودەل. بۇلارعا اقشا قالاي كەلەدى؟ ولاردا پروداكشندار، يۆەنت- اگەنتتىكتەر بار. سولاردىڭ ەسەبىنەن تەلەارنا جۇمىسى ءجۇرىپ وتىر. بۇل ستارتاپ بيزنەستىڭ بارلىق زاڭدىلىقتارىنا سايكەس قۇرىلعان.
«ادەمى- ايدىڭ» اسەم بۇيىمدارىن- اي!
بۇل كومپانيانىڭ نارىقتا جۇرگەنىنە 16 جىل بولدى. 2000 - جىلى قۇرىلعان «ادەمى- اي» ۇلتتىق ناقىشتاعى قولونەر بۇيىمدارىن، كادەسىيلار جاسايدى. بۇگىندە ەلىمىزدىڭ بارلىق قالالارىندا بولىمشەلەرى بار. تاۋارلارىنىڭ باعاسى قولجەتىمدى دەپ ايتۋعا كەلمەيدى. ءبىراق Empire سىندى ۇلتتىق بۇيىمدار دۇكەنىمەن سالىستىرعاندا ارزانىراق. ماسەلەن، كادەسىيلاردىڭ باعاسى - 20 مىڭ تەڭگەدەن جوعارى، ال جىبەك ورامالدار - 11 مىڭ تەڭگە شاماسىندا. ەسەسىنە بۇيىمداردىڭ ديزاينى مەن ساپاسى كوزگە ۇرىپ تۇر.
قۇرتافەللو ما، رافاەللو ما؟
بۇل برەند ەلىمىزدە بىلتىر عانا دۇنيەگە كەلدى. اتاۋى بارشاعا تانىس Rafaello سەكىلدى بولعانىمەن، تاتتىگە قاتىسى جوق. اتاۋىنداعى «قۇرت» جۇرناعى ايتىپ تۇرعانداي، اۋىلدىڭ قۇرتى. مۇنداي تاپقىرلىقتى وڭتۇستىك قازاقستان وبلىسىنىڭ تۇرعىنى، جاس كاسىپكەر ايناش ۋبايدۋللايەۆا ويلاپ تاپقان. اتاۋىنا بايلانىستى اۆتورلىق قۇقىق بويىنشا دا استانا قالاسىنىڭ ماماندارىمەن كەڭەسە وتىرىپ، بەكىتكەن. قۇرت باعاسى - 60 تەڭگەدەن 150 تەڭگەگە دەيىنگى ارالىقتا. ءبىراق قاپتاماسى قىمباتقا شىعىپ كەتكەندىكتەن ءبىر قورابى 250 تەڭگەدەن ساتىلادى. ازىرگە، قوراپتى قولدان جاسايدى. ءبىراق بيزنەس جاقسى دامىپ كەتسە، ارنايى قاپتاما جاسايتىن اپپارات الۋ ويىندا بار.
Mukajan - ۇلتتىق بۇيىمدار كومپانياسى
نەگىزىنەن، ۇلتتىق بۇيىمدار جاساۋمەن اينالىساتىن جاس كومپانيا. ءبىر ەرەكشەلىگى وسى بيزنەستى باستاۋ ءۇشىن نەسيە الىنباعان. تاۋارلاردىڭ باسىم كوپشىلىگى تەرىدەن جاسالادى. سونىڭ ىشىندە ءاميان، جول دوربا، سومكە، ۇيالى تەلەفونعا ارنالعان قاپتار جاسايدى. بۇيىمداردىڭ بارلىعى قولدان جاسالادى. سول سەبەپتى ءبىراز قىمباتقا تۇسەدى. سومكەلەر 20 مىڭنان جوعارى، ال ۇيالى تەلەفون قاپتارى 2 مىڭ تەڭگەدەن باستالادى.
بار بالاعا ارنالعان «بال بالا»
ويىنشىق بالانى تىنىشتاندىرىپ قانا قويماي، دامىتۋى دا ءتيىس. وسى رەتتە بەلگىلى پروديۋسەر، كاسىپكەر قىدىرالى بولمانوۆ جاقسى شەشىم ۇسىندى. 2010 -جىلى «بال بالا» اتتى ينتەراكتيۆ ويىنشىقتار جاسايتىن كومپانيا قۇرعان. ءبىر ەرەكشەلىگى بارلىق ويىنشىقتار ءپروتوتيپى - ءوزىمىزدىڭ ەرتەگى كەيىپكەرلەرى. ماسەلەن، الدار كوسە، تازشا بالا، ەر توستىك ويىنشىقتارى جاسالادى. سونداي- اق قاراقات ءابىلدينانىڭ دا قۋىرشاق ءتۇرى بار. باعالارى نارىققا ساي. ماسەلەن، الدار كوسە 7 مىڭعا جۋىق، ويىنشىق بارىستىڭ باعاسى - 3 مىڭ تەڭگەدەن.
P. S. وتاندىق ونىمدەردى قولداۋ ءۇشىن ارنايى باعدارلامالار قابىلدانۋدا. سونىمەن بىرگە جىل سايىن «قازاقستاندا جاسالعان» اتتى كورمە ۇيىمداستىرىلادى. سول جەردە ءار كاسىپكەر ءوز ونىمىنە جارناما جاساۋىنا بولادى. بيىل استانادا وتكەن مۇنداي كورمەگە 300-دەن اسا كومپانيا قاتىسقان. بۇل دا بولسا، ەلىمىزدە شاعىن جانە ورتا بيزنەستىڭ دامۋ قارقىنى ءوسىپ كەلەتىندىگىن كورسەتىپ وتىر. ەگەر باسەكەلەستىك وسىلايشا ارتاتىن بولسا، وتاندىق كاسىپورىنداردان ناعىز «بۋم» كۇتۋگە بولادى.
جادىرا اققايىر
