گرۋزيادا قازاقستاندىق تۋريست جوعالىپ كەتتى

استانا. قازاقپارات - گرۋزيا ىشكى ىستەر مينيسترلىگى سول ەلدە جوعالىپ كەتكەن قازاقستاندىق تۋريست سەرگەي تروفيموۆتى ىزدەۋدە.

بۇل تۋرالى قازاقپارات تىلشىسىنە ق ر س ءى م باسپا ءسوز قىزمەتىنىڭ جەتەكشىسى ءانۋار جايناقوۆ حابارلادى.

قازاقستاندىق ءتۋريستىڭ جوعالعانىن الەۋمەتتىك جەلىدە دوسى ءا. دۇيسەنبينوۆ جاريالادى. ول سەرگەيمەن 23 -شىلدەدەن باستاپ بايلانىس ۇزىلگەنىن جازدى. ونىڭ ايتۋىنشا، قازاقستان، رەسەي ارقىلى اۆتوستوپپەن ساياحاتتاۋ بارىسىندا سەرگەي 6 -شىلدەدە گرۋزياعا بارعان. ۆلاديكاۆكاز جاعىنان شەكارانى قيىپ وتكەن. تبيليسيگە بارىپ، سوندا 13 -شىلدەگە دەيىن بولعان. ونىمەن بايلانىس ۇزىلگەنگە دەيىن ول بورجومي، كۋتايسي، سۆانەتي، مەستي جانە ۋشگۋليدە بولعان.

«22 نەمەسە 23 -شىلدەدە سەرگەيدى ۋشگۋليدە كورگەن. سول جەردە تۇنەگەن بولۋى مۇمكىن. ورنالاسقان جەرىنە تاۋعا بارامىن دەپ سومكەسىن قالدىرعان. شحار تاۋى بولۋى مۇمكىن. ونىمەن بىرگە 2 اعىلشىن ءتىلدى تۋريست بولعان، ولار يزرايلدىقتار بولۋى ىقتيمال. سول كۇنى گەلەندجيكتەن دوسى سەرگەيگە كۇندىز 12 دە WhatsApp پەن حابارلاما جىبەرگەن، حابارلاما وعان جەتىپ، ونىڭ وقىعانىن بىلدىرەتىن ەكى كوك بەلگى شىققان»، - دەپ حابارلادى ءا. دۇيسەنبينوۆ.

ءا. جايناقوۆ حابارلاعانداي، قازاقستاندىقتى گرۋزيالىق پوليتسەيلەر ىزدەۋدە. قازاقستاندىق ديپلوماتتار گرۋزيا قۇقىق قورعاۋ ورگاندارىمەن بايلانىستا.

«بۇل ماسەلە گرۋزياداعى قازاقستان ەلشىلىگى باسشىلىعىنىڭ باقىلاۋىندا. قازىر ىزدەۋ شارالارى ءجۇرىپ جاتىر. ديپلوماتتار ونىڭ ازاماتتىق جۇبايىمەن بايلانىسقا شىقتى. قولدارىنان كەلگەنشە ءتيىستى كومەك كورسەتەدى. بۇدان باسقا، ءبىزدىڭ ازاماتتىڭ جوعالعانى جايلى گرۋزيا س ءى م حابارلار ەتىلدى، ەلدىڭ ءى ءى م- گە ساۋال جىبەرىلدى»، - دەپ اتاپ ءوتتى ءا. جايناقوۆ.