قىرعىزستان پرەزيدەنتى لاڭكەستەر تۋرالى قاتاڭداسقان زاڭعا قول قويدى
بۇل زاڭنىڭ ماقساتى - حالىقارالىق تەرروريزم مەن ەكسترەميزم سالاسىنداعى قىلمىستار ءۇشىن قاتاڭ جاۋاپكەرشىلىككە تارتۋ.
«قىرعىز رەسپۋبليكاسىنىڭ تەرروريزم مەن ەكسترەميزمگە قارسى كەيبىر زاڭنامالىق اكتىلەرىنە وزگەرىستەر ەنگىزۋ» زاڭ جوباسى جارىققا شىققاننان كەيىن ون كۇننەن سوڭ ءوز كۇشىنە ەنەدى. ول زاڭدى جوگوركۋ كەنەش 30 -شىلدەدە قابىلدادى. زاڭ جۇزىندە اكىمشىلىك جاۋاپكەرشىلىك كودەكسىنە، قىلمىستىق كودەكسىنە، قىلمىستىق- اتقارۋ كودەكسىنە جانە "تەرروريزمگە قارسى ارەكەت"، "ەكسترەميزم قىزمەتىنە قارسى ارەكەت"، "قىرعىزستان ازاماتتىعى" جانە "مەملەكەتتىك زەينەتكەرلىك الەۋمەتتىك ساقتاندىرۋ" زاڭدارىنا وزگەرتۋلەر ەنگىزىلەدى.
بۇل وزگەرىستەر جازالاۋدىڭ جانە جازا وتەۋ مەكەمەلەرىندە جازاسىن وتەيتىندەر ءۇشىن شارتتاردى قاتاڭداۋعا باعىتتالعان.
ەسكە سالايىق، كامەلەت جاسىنا تولماعانداردى قارۋلى قاقتىعىس بولىپ جاتقان جەرلەرگە اتتاندىرۋعا قىلمىستىق جازانى قاراستىراتىن زاڭعا وزگەرتۋلەر بولاتىندىعى ايتىلىپ وتىر. تەرروريستتىك جانە ەكسترەميستىك ارەكەتتەردى اشىق تۇردە قولداپ، عالامتوردا جاريالاعانى ءۇشىن ادامدار مەن ب ا ق وكىلدەرىنە 100 مىڭ سوم (1,5 مىڭ دوللار) ايىپپۇل سالىنۋى كەرەك دەگەن ۇسىنىس قابىلداندى. ەگەر وسى جاعداي ءبىر جىل ىشىندە قايتالاناتىن بولسا، وندا ول قىلمىستىق جازالاۋعا تارتىلادى.
