قازاقستاندا بالا تۋۋىنا بايلانىستى تولەمدەردى راسىمدەۋ جەڭىلدەتىلدى

استانا. قازاقپارات - بالا تۋۋىنا بايلانىستى تولەنەتىن الەۋمەتتىك تولەمدەردى راسىمدەۋگە قاجەتتى قۇجاتتار سانى ازايتىلدى.

بۇنداي ناتيجەگە ق ر دەنساۋلىق ساقتاۋ جانە الەۋمەتتىك دامۋ مينيسترلىگى مەن «ۇكىمەت ازاماتتار ءۇشىن» مەملەكەتتىك كورپوراتسياسىنىڭ بىرلەسكەن جۇمىسىنىڭ ارقاسىندا قول جەتكىزىلدى.

ەندى ءوتىنىش بەرەتىن كەزدە بولاشاق انالارعا جۇمىستان سوڭعى 12 ايداعى كىرىستەرى تۋرالى انىقتامانى اكەلىپ اۋرە بولمايدى. تەك جەكە كۋالىك، اۋرۋحانا پاراعىن جانە بانك ەسەپشوتىن ۇسىنسا بولعانى. جەكە كاسىپكەرلىكپەن اينالىساتىن ايەلدەرگە سالىق بويىنشا سالىستىرۋ اكتىسى مەن جەكە كاسىپكەرلىك تۋرالى كۋالىكتى ۇسىنۋلارى ءتيىس، دەپ جازادى «ۇكىمەت ازاماتتار ءۇشىن» مەملەكەتتىك كورپوراتسياسىنىڭ باسپا ءسوز قىزمەتى.

 «بۇرىن مەمكورپوراتسيا قىزمەتكەرلەرى اۆتوماتتاندىرىلعان اقپاراتتىق جۇيەدە الەۋمەتتىك سالىم اۋدارىمدارى تۋرالى اقپاراتتى جۇمىس ورنىنان بەرىلگەن انىقتامامەن سالىستىراتىن، ەگەر سايكەس كەلمەسە، ءوتىنىش بەرۋشىگە قۇجاتتارىن قايتارىپ، قايتادان ناقتىلاۋىن سۇرايتىن ەدى»، - دەيدى «ۇكىمەت ازاماتتار ءۇشىن» مەملەكەتتىك كورپوراتسياسى زەينەتاقى تولەۋ جونىندەگى مەملەكەتتىك ورتالىقتارى ديرەكسياسى باسشىسىنىڭ ورىنباسارى سەرىكقان سابىرجانوۆ.

«قازىر وزگەرىستەردىڭ ارقاسىندا دەكرەتتىك تولەمدەر الەۋمەتتىك سالىمداردىڭ قولدا بار سوماسى بويىنشا انىقتالادى. ايتا كەتۋ كەرەك، دەكرەتتىك تولەمدەردىڭ كولەمى تىكەلەي جۇمىس بەرۋشىگە، ونىڭ الەۋمەتتىك سالىمداردى دەر ۋاقىتىندا، دۇرىس كولەمدە اۋدارۋىنا بايلانىستى»، - دەدى ول.

دەكرەتتىك تولەمدەردەن تىس، زەينەتاقى مەن وزگە الەۋمەتتىك تولەمدەر تۋرالى تۋىنداعان قوسىمشا سۇراقتاردى 1411 تەگىن نومىرىنە قوڭىراۋ شالۋ ارقىلى بىلۋگە بولادى.

جىل باسىنان بەرى مەملەكەتتىك كورپوراتسياعا دەكرەتتىك تولەمدەر بويىنشا 97,5 مىڭ ءوتىنىش كەلىپ تۇسكەن.

اۆتور: جاسۇلان جولدىبايەۆ