الماتىدا سوعىلعان اۆتوبۋستا زارداپ شەككەندەر اراسىندا جۇكتى ايەل بولعان

الماتى. قازاقپارات - بۇگىن الماتى قالاسىنىڭ دەنساۋلىق ساقتاۋ باسقارماسى كەشە جول ايىرىق قابىرعاسىنا سوعىلعان اۆتوبۋس تۋرالى تۇسىنىكتەمە بەردى.

ەسكە سالا كەتەلىك، جول اپاتى كەشە - 3 -تامىز كۇنى تۇستەن كەيىن شامامەن 16:30 دا رايىمبەك داڭعىلى مەن ءسۇيىنباي كوشەسىنىڭ قيىلىسىندا بولعان.

Yutong ماركالى 92- باعدار بويىنشا قاتىنايتىن قوعامدىق اۆتوبۋس ءسۇيىنباي داڭعىلىمەن وڭتۇستىك باعىتتا كەلە جاتىپ، رايىمبەك داڭعىلىنا جەتىپ، تۋننەل ارقىلى وڭعا قاراي بۇرىلار ساتتە جول ايرىعىنىڭ تەمىر- بەتوننان جاسالعان قابىرعاسىنا سوعىلدى.

«وقيعا سالدارىنان 13 ادام زارداپ شەكتى. ولاردىڭ ىشىندە 10 ادام قالالىق اۋرۋحانالارعا، ال تاعى 3 ادام وبلىستىق اۋرۋحاناعا جەتكىزىلدى. قالالىق اۋرۋحانالارعا جەتكىزىلگەن 10 ادامنىڭ التاۋى تەكسەرىلگەننەن كەيىن ۇيىنە قايتارىلدى. ال، قالعان 4 ادام ستاتسيونارعا جاتقىزىلدى. ولاردىڭ ىشىندە ەكى ادام قالالىق ورتالىق كلينيكالىق اۋرۋحاناعا، ءبىر ادام قالالىق جەدەل شۇعىل كومەك كورسەتۋ اۋرۋحاناسىنا، تاعى ءبىر ادام - 7- قالالىق كلينيكالىق اۋرۋحاناعا جاتقىزىلدى. زارداپ شەككەندەردىڭ نەگىزىنەن اياق-قولدارى سىنعان جانە ولار جابىق تۇردەگى باس سۇيەگى زاقىمدانعان. ەكى ادامعا وتا، ءبىر ادامنىڭ جاراقاتىنا العاشقى حيميالىق ەم-دوم جاسالدى. زارداپ شەككەندەردىڭ ەڭ جاسى -14 تە»، - دەدى الماتى قالالىق دەنساۋلىق ساقتاۋ باسقارماسىنىڭ باس حيرۋرگى نۇرجان يسابەكوۆ.

ودان باسقا، ول زارداپ شەككەندەردىڭ ءبىرىنىڭ جۇكتى ايەل ەكەندىگىن ايتتى. بۇل ايەلدىڭ ميى شايقالىپ، دەنەسىنىڭ تەرىسى كوگەرگەن.

 ول اۋرۋحاناعا جەتكىزىلگەن سوڭ، تەز ارادا ىشىنە ۋلترادىبىستىق زەرتتەۋ شاراسى جۇرگىزىلدى.

«جۇكتى ايەلدىڭ ىشتەگى بالاسى امان. قازىر ول نەيروحيرۋرگيا بولىمىندە جاتىر»، - دەدى ن. يسابەكوۆ.

اۆتور: ايبوتا جاپپاربەرگەن