قازاقستاندا قالىڭدىق ۇرلايتىندارعا قاتىستى بولەك زاڭ جوق - ساراپشى
جۇلدىزدىڭ وتباسى قىزىن ۇرلاعاننىڭ ۇستىنەن ارىزدانبايتىن بولدى. وسى جاعدايعا بايلانىستى، بەلگىلى ادۆوكات جوحار وتەبەكوۆ ءوز پىكىرىن ءبىلدىردى.
ايتا كەتەيىك، وقيعا جەلىسى بويىنشا انىقتالعانى، جۇلدىزدى بەلگىسىز بىرەۋلەر قالىڭدىق رەتىندە الىپ قاشقان. جۇلدىز ءتىپتى، ءوزىن الىپ قاشقان جىگىتتى تانىمايتىنىن ايتقان. قوعامدا ۇلكەن شۋ كوتەرىلگەن سوڭ، الىپ قاشقاندار ءوز ەركىمەن جۇلدىزدى ۇيىنە قايتارعان.
«بۇل جەردە ماسەلە كەلىسۋدە نەمەسە تاتۋلاسۋدا ەمەس. ق ر قىلمىستىق كودەكسى ۇرلانعان ادامنىڭ ءومىرىن، كىنالىلەردى جازالۋدان جوعارى قويادى. ياعني، ەگەر قىز ۇرلاعاندار ونى ءوز ەرىكىمەن امان-ەسەن قايتاراتىن بولسا، وندا قىلمىستىق جاۋاپقا تارتىلمايدى. نە ءۇشىن؟ بۇل جەردە باستى ماقسات - ۇرلانعان ادامنىڭ ءومىرىن قالايدا ساقتاپ قالۋ. ەگەر، قىلمىستىق جاۋاپقا تارتىلمايتىنىن بىلسە، وندا قىز ۇرلاۋشىلار ونى قورىقپاي قايتارا الادى. ءبىراق، ۇرلانعان ادامنىڭ دەنساۋلىعىنا زيان كەلتىرىلگەن بولسا، وعان زورلىق- زومبىلىق كورسەتىلگەن بولسا، قارۋ قولدانىلسا جانە باسقا دا زاڭسىز ارەكەتتەر جاسالسا، وندا كىنالىلەر مىندەتتى تۇردە قىلمىستىق جاۋاپقا تارتىلادى»، - دەدى ادۆوكات.
زاڭگەردىڭ ايتۋىنشا، زاڭ نورماسى بويىنشا ۇرلانعان ادامنىڭ ءتىرى قالعانى ماڭىزدى. ادام ۇرلانعان جاعدايدا زاڭنىڭ بۇل نورمالارى اشىق تۇردە جاريالانۋى ءتيىس. بۇل ادام ءومىرىن ساقتاپ قالۋى مۇمكىن.
«بىزدە قالىڭدىق ۇرلاۋعا قاتىستى بولەك زاڭ نورماسى جوق. الايدا، ادام ۇرلاۋعا قاتىستى ق ر ق ك 125- بابى بار. قىزدى الىپ قاشۋعا ادەتتە بىرنەشە ادام قاتىسادى. ولار الدىن الا ءسوز بايلاسادى. بۇل جەردە 7 جىلدان 12 جىلعا دەيىن باس بوستاندىعىنان ايىرۋ جازاسى قاراستىرىلعان. ءبىراق، ىستەر نەگىزى سوتقا جەتپەيدى دەسە دە بولادى»، - دەدى ادۆوكات.
اۆتور: ايبوتا جاپپاربەرگەن
