تەگىن وقۋ گرانتىنا تۇسە الماعان تۇلەكتەرگە ءبىلىم بەرۋ كرەديتى بەرىلەدى
2016 -جىلى ءبىلىم گرانتىنا يە بولا الماعان تالاپكەرلەر وقۋ اقىسىن تولەي الماعان جاعدايدا ءبىلىم بەرۋ كرەديتتەرىن كەپىلدەندىرۋدىڭ مەملەكەتتىك باعدارلاماسىنا جۇگىنىپ، جىلدىق %10 دان باستالاتىن پايىزدىق مولشەرلەمەمەن 12 جىلعا دەيىنگى مەرزىمگە ق ر ءبىلىم جانە عىلىم مينيسترلىگى «قارجى ورتالىعى» ا ق- نىڭ كەپىلدىگىمەن نەسيە رەسىمدەي الادى.
ءبىلىم بەرۋ كرەديتتەرى تالاپكەرلەرگە دە، جوو جانە كوللەدج ستۋدەنتتەرىنە دە بەرىلەدى.
قازىرگى تاڭدا ءبىلىم بەرۋ كرەديتتەرى قارجى ورتالىعىمەن سەرىكتەس بانكتەردە ءار ءتۇرلى شارتپەن ۇسىنىلادى. باعدارلامانىڭ قولدانىلۋ اۋقىمى كەڭ، سەرىكتەس بانكتەر ەلىمىزدىڭ بارلىق ايماعىندا جۇمىس ىستەيدى. كرەديتتىڭ بەرىلۋ مەحانيزمى بىردەي: قارىز الۋشى بانككە بارىپ كەڭەس الادى، رەسىمدەۋگە قاجەتتى قۇجاتتاردى جيناپ، بانككە تاپسىرادى.
ءبىلىم بەرۋ كرەديتى قاجەتتىلىككە قاراي ءار سەمەستر نەمەسە جىل سايىن وقۋ ورنىنىڭ ەسەپشوتىنا اۋدارىلادى.
الايدا قارجى ورتالىعىنىڭ كەپىلدىگىمەن ءبىلىم بەرۋ كرەديتىن الۋ ءۇشىن ءبىر نەمەسە ەكى قوسالقى قارىز الۋشى بولۋى ءتيىس. بۇل جەردە قوسالقى قارىز الۋشىنىڭ تولەم قابىلەتتى، ياعني نەگىزگى جۇمىس ورنى بويىنشا الاتىن تابىسى ەسكەرىلەدى.
كرەديتتىڭ سوماسىنا شەكتەۋ قويىلمايدى، باستىسى بارلىق وقۋ كەزەڭى ءۇشىن وقۋ قۇنىنان اسپاسا بولعانى.
ەرەكشە اتاپ كەتەرلىگى، بۇل باعدارلامادا جەڭىلدىكتى كەزەڭ بەرىلەدى، ياعني وقۋ كەزەڭى مەن وقۋدى بىتىرگەننەن كەيىن 6 ايعا كرەديتتى تولەۋ مەرزىمى كەيىنگە شەگەرىلەدى. كرەديتتى كەز كەلگەن ۋاقىتتا مەرزىمىنەن بۇرىن وتەۋگە بولادى، ول ءۇشىن ايىپپۇل سانكتسيالارى قولدانىلمايدى.
ءبىلىم بەرۋ كرەديتتەرىن كەپىلدەندىرۋدىڭ مەملەكەتتىك باعدارلاماسى ارقاسىندا ستۋدەنت ءوز كۇشىمەن ءوز بولاشاعىن جوسپارلاي الادى.
