جەكە كۋالىگىڭىزدەگى اتى-ءجونىڭىزدى قازاقشالاعىڭىز كەلسە

استانا. قازاقپارات - سوڭعى كەزدەرى قازاق ازاماتتارىنىڭ اراسىندا - وۆ، - يەۆ، - وۆا، - يەۆا سەكىلدى ءوزىنىڭ تەگىنە جارماسقان جالعاۋلاردان ارىلعىسى كەلەتىندەر كوبەيىپ كەلەدى.

وسى ورايدا وقىرماندارىمىزعا اتالعان ماسەلەنى وڭاي شەشۋ ءۇشىن از-كەم اقپارات بەرەمىز.

قازاق حالقىنىڭ قالىپتاسقان داستۇرلەرىنە ساي ۇلتى قازاق ازاماتتاردىڭ تەگى مەن اكەسىنىڭ اتى جازىلۋى وزگەرگەن جاعدايدا (- وۆ، - يەۆ، - ين جانە ت. ب. جالعاۋلارسىز، اكەسىنىڭ اتىنا ۇلى، قىزى سوزدەرىن قوسۋ ارقىلى) ازاماتتىڭ جەكە باس كۋالىگىن جانە ءتولقۇجات الۋىنا قاجەتتى قۇجاتتار:

- تۇراقتى تىركەۋدى راستايتىن ازاماتتاردى تىركەۋ كىتابى نەمەسە مەكەنجاي انىقتاماسى؛

- مەملەكەتتىك نەمەسە ورىس تىلدەرىندە قالاۋلى تەگى، اكەسىنىڭ اتى كورسەتىلىپ، اۋىستىرىلۋعا ءتيىستى قۇجاتتار جايلى مالىمەتتەر باياندالعان جازباشا ءوتىنىش؛

- اۋىستىرىلۋعا ءتيىستى جەكە باس كۋالىگى، ءتولقۇجات؛

- تۋۋ تۋرالى كۋالىك جەكە باستى كۋالاندىراتىن قۇجات العاش رەت الىنعان كەزدە كورسەتىلەدى.

- 3,5х4,5 مولشەرلى 3 فوتوسۋرەت؛

- جەكە باس كۋالىگى ءۇشىن 0,2 ايلىق ەسەپتىك كورسەتكىشتەگى سوما، ءتولقۇجات ءۇشىن 4 ا ە ك كولەمىندە مەملەكەتتىك باج سالىعى تولەنگەنى جايىنداعى تۇبىرتەك.

اتالعان قۇجاتتارىڭىز دايىن بولىسىمەن حالىققا قىزمەت كورسەتۋ ورتالىقتارىنا بارىپ، ءوزىڭىزدىڭ تەگىڭىزدى قازاقشا جازدىرۋعا ءوتىنىش بەرە الاسىز. مەملەكەتتىك قىزمەت جەدەل تۇردە 7, 10 جانە 15 جۇمىس كۇنى ىشىندە كورسەتىلۋى مۇمكىن. جەدەل تۇردە راسىمدەۋدىڭ باعاسى: 7 جۇمىس كۇنى - 1989 تەڭگە، 10 جۇمىس كۇنى - 904 تەڭگە، 15 جۇمىس كۇنى - 563 تەڭگە.

 

دەرەك كوزى: islam.kz