برازيليادا وليمپيادا بايراعىنىڭ استىندا ونەر كورسەتەتىن بوسقىندار قۇراماسى - فوتو
جاقىندا عانا ءولىم اۋزىندا بولعان سپورتشىلار ەندى وليمپيا ويىندارىنا قاتىسۋعا مۇمكىندىك الدى.
ب ۇ ۇ مالىمەتتەرى بويىنشا، الەمدە بوسقىندار سانى رەكوردتىق دەڭگەيگە جەتتى.
2015 -جىلى الەمدە 65,3 ميلليون ادام ءوز وتانىن تاستاپ، كوشۋگە ءماجبۇر بولعان. بوسقىنداردىڭ 60 ميلليوننان اسۋى تاريحتا تۇڭعىش رەت ورىن الىپ وتىر.
حالىقارالىق وليمپيادا كوميتەتى بوسقىنداردى نازاردان تىس قالدىرمادى. بيىل وڭتۇستىك سۋدان، ەفيوپيا، كونگو جانە سيريا ەلدەرىنەن ون سپورتشى ريوداعى ءتورت جىلدىقتىڭ باستى دوداسىنا قاتىسادى.
«وليمپيادا - تولەرانتتىلىق، ىنتىماقتاستىق جانە بەيبىتشىلىك ۋاقىتى. حوك بوسقىن- سپورتشىلاردى ريو- دە- جانەيرو ويىندارىنا قاتىسۋ ءۇشىن شاقىرادى. ءبىز 60 ميلليون بوسقىننىڭ تاعدىرىنا نازار اۋدارتۋ ءۇشىن بارشا الەمدىك قاۋىمداستىققا ۇندەۋ جىبەرەمىز»، - دەدى حالىقارالىق وليمپيادا كوميتەتىنىڭ پرەزيدەنتى توماس باح.
ح و ك- تىڭ بۇل يدەياسىن ب ۇ ۇ- عا مۇشە 193 مەملەكەتتىڭ 180 ى قولدادى. بارلىق شىعىندى كوميتەت ءوز موينىنا الدى. بۇل باستاماعا بار-جوعى 2 ميلليون دوللار جۇمسالماق.
دجەيمس چينگدجەك
وڭتۇستىك سۋدان تۋماسى دجەيمس چينگدجەكتىڭ تاعدىرىنا ۇڭىلەتىن بولساق، بۇل سپورتشىنىڭ كورمەگەن قياناتى جوق. بالا جاسىندا ازاماتتىق سوعىس بارىسىندا اكەسىنەن ايىرىلعان ول 13 جاسىندا قولىنا قارۋ الادى. ونىڭ دا جانى سول سوعىستا پيدا بولۋ كەرەك بولاتىن، الايدا ول اكەسىنىڭ تاعدىرىن قايتالاپ، ازاماتتىق سوعىستا ءشاحيد بولۋدى قالامادى. كەنياعا قاشىپ كەتكەن بوزبالا، جوق- جىتىكتەر تۇراتىن «كاكۋما» لاگەرىندە ءومىر ءسۇردى. شاڭدى بوران، لاس ورتا ونىڭ دەنساۋلىعىنا ەداۋىر زاردابىن تيگىزدى، ءبىراق ول جەردەن چينگدجەك امان- ەسەن شىعادى. شىعىپ قانا قويماي، مەكتەپكە تۇسەدى، جۇگىرۋمەن شىنداپ اينالىسا باستايدى. دجەيمستە adidas پەن Nike بولعان جوق، مارافوندىق قاشىقتىقتارعا جالاڭ اياق شىعاتىن ەدى. كومبەگە كەلگەن سوڭ، تاۋلى جەردە تىلىنگەن تابانىن شۇبەرەكپەن وراپ الاتىن. چينگدجەك مارافوندىق جارىستاردا بالەندەي ناتيجەلەر كورسەتە المادى، دەگەنمەن، ول ريودا 400 مەترلىك قاشىقتىقتا باق سىنايدى.
يوناس كيندە
مارافوندىق جارىسقا ەفيوپيادان ليۋكسەنبۋرگە كوشۋگە ءماجبۇر بولعان يوناس كيندە بارادى. قارسىلاستار ۆادا جىبەرگەن حاتتارعا نەمقۇرايلىق تانىتىپ، كۋرورتتاردا سايران قۇرىپ جاتقاندا ول قالادا كولىگىمەن ادام تاسىپ، ءناپاقا تاۋىپ ءجۇردى. يوناس كيندە - تاكسي قىزمەتىندە جۇرگىزۋشى. ءوز وتباسىن اسىراۋ ءۇشىن وعان جۇمىستى كوپ ىستەۋ قاجەت. 2 ساعات 17 مينۋت 31 سەكۋند - ونىڭ فرانكفۋرتتا كورسەتكەن ەڭ ۇزدىك ۋاقىتى. بۇل كورسەتكىش وعان ۇزدىك وتىزدىققا كىرۋگە مۇمكىندىك بەرەدى دەپ توپشىلانىپ وتىر. ونىڭ كۇن ساناپ قارقىن الىپ جاتقانىن ەسكەرسەك، كيندە ريوعا قۇر- بوسقا بارا جاتقان جوق. ليۋكسەنبۋرگ قۇراماسى ونى ءوز قاتارىنا الماق بولدى، الايدا ازاماتتىق الۋ ماسەلەسى قيىن بولدى.
يولاندا مابيكا مەن پوپولە ميسەنگا
يولاندا مابيكا مەن پوپولە ميسەنگا كونگوداعى سوعىستان زارداپ شەكتى. پوپولە اناسىنىڭ قازاسىنان كەيىن ورمانعا قاشىپ، وندا ومىرىمەن قوش ايتىسا جازدادى. بالالار ەل استاناسى - كينشاسا قالاسىنا الىپ كەلەدى. ولار ءبىر- بىرىمەن دزيۋدومەن اينالىسۋ كەزىندە تانىسادى. 2013 -جىلى ولار برازيليادا وتكەن الەم چەمپيوناتىنا كەلەدى، سول كەزدە ولاردىڭ اۋىر تاعدىرى بارشا الەمگە ءمالىم بولادى.
جارىس قارساڭىندا باپكەرلەر يولاندا مەن پوپولەنى قوناق ءۇي نومەرىنە قاماپ، سۋسىز، تاماقسىز قالدىرادى. ەكى كۇننەن سوڭ، ميسەنگا قاشىپ قۇتىلادى، كەيىن بوسقىندارعا كومەك قوعامىن تاۋىپ الىپ، يولاندانى الىپ كەتەدى. سپورتشىلاردىڭ ءسوزى بويىنشا، تۋرنيردە ناتيجە كورسەتپەگەندەرى ءۇشىن باپكەر ولاردى تەمىر تورعا توعىتىپ، اس- سۋسىز قاماۋدا ۇستايتىن بولعان. دزيۋدوشىلار وتاندارىنا قايتىپ ورالۋدان باس تارتتى، قازىر ولار برازيليادا. ميسەنگا جۇك كولىگىنىڭ جۇرگىزۋشىسى بولسا، مابيكا تىگىن فابريكاسىندا قىزمەت ەتەدى.
يۋسرا مارديني
يۋسرا مارديني سيريادا ءوستى جانە جۇزۋدەن وسى ەلدىڭ نامىسىن قورعاۋ ءۇشىن الەم چەمپيوناتىنا قاتىسقان. الايدا ونىڭ ەلىندە تۇتانعان ازاماتتىق سوعىس ونى باسپاناسىنان ايىردى. مارديني سىڭىلىسىمەن تۇركيا ارقىلى ەۋروپاعا قاشۋعا بەل بايلايدى. ەگەي تەڭىزى ارقىلى ءوتۋ مارديني ءۇشىن ۇلكەن سىن بولدى. 6 ادامدىق ەسكى قايىققا 20 ادام ءمىنىپ العان بولاتىن، قايىقتىڭ قوزعالتقىشى بۇعان شىداس بەرمەي، ورتا جولدا بۇزىلدى. تەڭىز ورتاسىندا كىمنىڭ جان تاپسىرعىسى كەلەدى، مارديني مەن ونىڭ ءسىڭىلىسى جانە تاعى ءبىر سيريالىق بوسقىن سۋعا سەكىرىپ ءتۇسىپ، قايىقتى ءتورت ساعات بويى يتەرىپ كەلگەن. 200 جانە 400 مەترلىك جارىستارعا قاتىسىپ جۇرگەن سپورتشى ءۇشىن بۇل تىم كوپ، دەگەنمەن مارديني بۇل بەلەستى دە وتكەردى.
رامي انيس
سيريادان شىققان تاعى ءبىر سپورتشى بار، ول - رامي انيس. ءجۇزۋ سپورتىنا قاتىساتىن ول، سيريالىق الەپپو قالاسىنان قاشىپ، تۇركياعا بەت الادى. وندا «گالاتاساراي» سپورت ۇيىرمەسىندە جاتتىعادى. ول گرەتسياعا دەيىن تەڭىز ارقىلى ۇرمەلى قايىقپەن كەلگەن، ەسكەكتىڭ ورنىنا اعاش بۇتاقتارىن قولدانىپتى.
پاولو لوكورو، انجەلينا لوحاليف، روۋز لوۋكوۋنەن مەن يەح بيل
ريوعا وڭتۇستىك سۋداننان تاعى ءتورت سپورتشى بارادى. پاولو لوكورو، انجەلينا لوحاليف، روۋز لوۋكوۋنەن مەن يەح بيل «كاكۋما» لاگەرىندە تۇرعان. جۇلدەگە قول سوزۋ ولارعا قيىن بولادى، دەگەنمەن ويىنعا قاتىسۋعا ابدەن لايىق سپورتشىلار.
ولار ويىنداردىڭ اشىلۋ سالتاناتىندا وليمپيادانىڭ 207- قاتىسۋشىسى رەتىندە ح و ك بايراعىنىڭ استىندا كەنيا مارافونشىسى، الەم چەمپيوناتىنىڭ بەس دۇركىن چەمپيونى - تەگلا لورۋپەنىڭ باستاۋىمەن شەرۋدە ءبىر قۇراما رەتىندە ءجۇرىپ وتپەك.
اۆتور: جاسۇلان جولدىبايەۆ
