وڭتۇستىك قازاقستاندا مەيرامبەك راحماتۋللايەۆتى اقتىق ساپارعا شىعارىپ سالدى

استانا. قازاقپارات - وڭتۇستىك قازاقستاندىقتار الماتىدا بولعان وقيعادا ەرلىكپەن قازا تاپقان پوليتسيا لەيتەنانتىن اقتىق ساپارعا شىعارىپ سالدى، دەپ حابارلادى ايماق باسشىسىنىڭ باسپا ءسوز قىزمەتىنەن.

بۇگىن وڭتۇستىك قازاقستان وبلىسىنىڭ قازىعۇرت اۋدانىندا قارالى جيىن ءوتتى. اۋداننىڭ قاراباستاۋ اۋىلىنىڭ تۇرعىندارى مەن ىشكى ىستەر سالاسىنىڭ قىزمەتكەرلەرى الماتىدا ورىن العان وقىس جاعداي كەزىندە اۋىر جارالانىپ، جان ساقتاۋ بولىمىندە كەشەگى كۇنى كوز جۇمعان پوليتسيا لەيتەنانتى مەيرامبەك راحماتۋللايەۆتى اقتىق ساپارعا شىعارىپ سالدى. جەرلەۋ راسىمىنە و ق و اكىمدىگى مەن الماتى قالالىق اكىمدىگىنىڭ وكىلدەرى، سونداي-اق، ىشكى ىستەر سالاسىنىڭ جەتەكشىلەرى دە قاتىستى.

قارالى باسقوسۋعا كەلگەن وبلىس اكىمىنىڭ ورىنباسارى ج. بوكەنبايەۆ ەرلىكپەن قازا تاپقان مارقۇمنىڭ بۇل قايعىسى ونىڭ تۋىستارىنىڭ عانا ەمەس، بارشا قازاقستاندىقتاردىڭ كوڭىلىنە قاياۋ سالعانىن بايان ەتتى.

ايتا كەتەيىك، م. راحماتۋللايەۆتىڭ تۋىستارىنا الماتى قالالىق اكىمدىگىنەن 15 ميلليون تەڭگە، وڭتۇستىك قازاقستان وبلىسىنىڭ اكىمدىگىنەن قوسىمشا 5 ميلليون تەڭگە بەرىلەتىن بولادى. سونىمەن بىرگە، ىشكى ىستەر سالاسىنىڭ قىزمەتكەرلەرى ءبىر كۇندىك جالاقىلارىن الماتىدا بولعان قاندى وقيعا كەزىندە قازا تاپقاندار مەن زارداپ شەككەندەردىڭ وتباسىلارىنا اۋدارۋدى ۇيعارىپ وتىر.