جاز مەزگىلىن دەنساۋلىققا پايدالى ەتۋ ءۇشىن، قالاي ءتيىمدى ەتىپ وتكىزۋ كەرەك؟

استانا. قازاقپارات - جاز - دەنساۋلىقتى قولعا الاتىن تاماشا كەزەڭ.

اۋا- رايى -  جايما- شۋاق، كۇن -  ۇزاق، ياعني ۇيدە وتىرۋدىڭ ءجونى جوق.

ساناۋلى ساعاتتاردى ساپالى وتكىزىڭىز! ويتكەنى، بۇگىن، جازدىڭ ەڭ سوڭعى ايىنا قادام باستىق. جاز مەزگىلىندە قالايشا دەنساۋلىقتى نىعايتۋعا بولادى؟

كوبىرەك جاياۋ ءجۇرىڭىز. ەگەر مۇمكىندىك بولسا، ءبىر- ەكى ايالداما ەرتە ءتۇسىپ قالىپ، جاياۋ ءجۇرىڭىز. اياعىڭىزدى شاپشاڭ باسىپ، تەرەڭىرەك دەمالىڭىز. وسىلاي 10 مينۋت جۇرسەڭىز قۋات- كۇشىڭىز ارتا تۇسەدى. نايزاعاي كۇركىرىنەن كەيىن نەمەسە جاڭبىر سەبەلەپ تۇرعاندا سەرۋەندەۋ وتە پايدالى. مۇنداي كۇندەرى اۋا تازاراق بولادى.

ۆەلوسيپەد تەبىڭىز. تازا اۋادا قيمىل- قوزعالىس جاساۋ وتتەگىنىڭ كىرۋىن جاقسارتادى. ۆەلوسيپەد تەبۋ اياق بۇلشىق ەتتەرىن قاتايتادى.

جۇگىرىپ تۇرىڭىز. جۇگىرۋ تىنىس الۋ جۇيەسى مەن قان اينالىم جۇمىسىن رەتتەيدى، جۇرەك قان- تامىرلارىن قاتايتادى، سترەسستىڭ الدىن الادى.

جالاڭ اياق ءجۇرىڭىز. ءشوپتىڭ ۇستىندە، قۇمدا، تاستا جالاڭ اياق ءجۇرۋ - نۇكتەلى ماسساج بولىپ ەسەپتەلەدى. تابانداعى نۇكتەلەردى ىنتالاندىرۋ ومىرگە قاجەتتى ەنەرگيانى وياتادى.

شومىلىڭىز، سۋدا ءجۇرىڭىز. تازا اۋادا سۋ پروتسەدۋرالارى اعزانى شىمىر ەتەدى، قان اينالىمىن جاقسارتادى. جۇزۋمەن قاتار سۋدا ءجۇرۋدى نەمەسە سۋ ويىندارىن ويناساڭىز بولادى. بۇل، اسىرەسە، جۇزە المايتىندارعا جاقسى بالاما. سۋ سۋىق بولسا دا، اياعىڭىزدى سالىپ وتىرىڭىز. وسىلايشا يممۋنيتەتىڭىزدى جاقسارتاسىز.

ءشوبى شۇيگىن ساياباققا، ورمانعا كەز كەلگەن جەرگە بارىڭىز. ورمان اۋاسى تىنىس الۋدى رەتتەيتىن، قان قۇرامىنداعى گەموگلوبيندى كوتەرەتىن، يممۋنيتەتتى نىعايتاتىن، مي جۇمىسىن جاقسارتاتىن زاتتەكتەرمەن قانىققان.