بەرىك ءۋالي ق ر ي د م- نىڭ قوعاممەن بايلانىس ءبولىمىنىڭ مەڭگەرۋشىسى بولىپ تاعايىندالدى
بۇل تۋرالى مينيستر جەڭىس قاسىمبەك فەيسبۋكتەگى پاراقشاسىندا جاريا ەتتى.
«تانىمال تەلەجۋرناليست، قوعام بەلسەندىسى بەرىك ءۋالي ق ر ينۆەستيتسيالار جانە دامۋ مينيسترلىگىنە جۇمىسقا كەلىپ جاتىر. بەرىك ءۋالي بۇگىننەن باستاپ مينيستردىڭ كەڭەسشىسى ءارى قوعاممەن بايلانىس ءبولىمىنىڭ مەڭگەرۋشىسى بولىپ تاعايىندالدى» ، دەپ جازدى قر ينۆەستيتسيالار جانە دامۋ ءمينيسترى جەڭىس قاسىمبەك.
ونىڭ ايتۋىنشا، مينيسترلىكتە اقپاراتتىق قامتاماسىز ەتۋمەن اينالىساتىن ارنايى دەپارتامەنت قۇرىلۋدا. الداعى ۋاقىتتا مينيسترلىك وسى دەپارتامەنت ارقىلى قوعاممەن بايلانىستى كۇشەيتۋدى كوزدەپ وتىر.
بەرىك ءۋالي جۋرناليستيكا سالاسىندا جيناعان تاجىريبەسىن سوڭعى جىلدارى مەملەكەتتىك قىزمەتتە دە ءتيىمدى ۇشتاستىرىپ كەلەدى. و ق و اكىمى اپپاراتى باسشىسىنىڭ ورىنباسارى - باسپا ءسوز قىزمەتىنىڭ باسشىسى، و ق و ىشكى ساياسات جانە ءدىن ىستەرى باسقارماسىنىڭ باسشىسى، «نۇر وتان» پارتياسى ءتوراعاسى ءبىرىنشى ورىنباسارىنىڭ كەڭەسشىسى قىزمەتتەرىن ابىرويمەن اتقارعان.
جەڭىس قاسىمبەك بەرىك ءۋاليدى جاڭا قىزمەتىمەن قۇتتىقتاپ، مينيسترلىكتىڭ جۇمىسىن حالىققا جاقىنداتۋعا باعىتتالعان يگى ىستەردىڭ باستاماشىسى بولاتىندىعىنا سەنىم ءبىلدىردى.
بۇعان دەيىن ق ر ي د م بۇرىنعى رەسمي وكىلى قايسار جۇماباي ۇلى فەيسبۋكتەگى پاراقشاسىندا «بۇگىن مەنىڭ دە كاسىبي ومىرىمدە ايتارلىقتاي وزگەرىس. جۇمىسىمدى اۋىستىرۋعا بەل بۋدىم»، دەپ جازدى. ال مينيسترلىكتىڭ كادر جۇمىسى دەپارتامەنتىنىڭ ديرەكتورى مارات يعاليەۆ فەيسبۋكتە قايسار جۇماباي ۇلىنا بىرلەسىپ 7 جىل جۇمىس ىستەسكەنىنە العىس ءبىلدىردى.
