ريو وليمپياداسى قارساڭىندا قۇراما باپكەرى ەسكەكشى داۋلەت سۇلتانبەكوۆتىڭ جولداماسىنان ايىردى

استانا. قازاقپارات - قازىرگى ۋاقىتتا قازاقستاننىڭ بايداركا جانە كانوەدە ەسكەك ەسۋ قۇراماسى ريو- دە- جانەيرو وليمپياداسى الدىندا سوڭعى وقۋ- جاتتىعۋ جيىندارىن چەحيادا وتكىزۋدە.

اتالمىش قۇراماداعى سپورتشىلار مەن ولاردىڭ دايىندىعى جايىندا «قازاقپارات» تىلشىسىنە بەرگەن سۇحباتىندا وڭتۇستىك قازاقستان وبلىسى بويىنشا فەدەراتسيانىڭ پرەزيدەنتى دەنيس جارمەنوۆ ايتىپ بەردى.

ءبىر اپتا بۇرىن ق ر قۇراماسىنىڭ قۇرامى بەكىتىلگەن. قورىتىندى تىزىمدە تەك ءبىر عانا وزگەرىس ورىن الدى - ازيا ويىندارىندا التىن جۇلدە العان جانە ستۋدەنتتەر اراسىندا الەم چەمپيوناتىنىڭ جەڭىمپازى 21 جاستاعى داۋلەت سۇلتانبەكوۆتىڭ ەسىمى جوق.

 باس باپكەر اندرەي شانتاروۆيچتىڭ ءسوزى بويىنشا، داۋلەت كوكتەمدە قازاقستان چەمپيوناتىنا كەلمەگەن. سول سەبەپتى ونىڭ جولداماسى باسقا سپورتشىعا بۇيىردى. ءوز كەزەگىندە سپورتشىنىڭ ايتۋىنشا، باسپانى (انگينا) ەمدەۋ جانە تولىق قالىپقا كەلۋ ءۇشىن ەل بىرىنشىلىگىنە قاتىسپاۋعا باپكەردىڭ ءوزى رۇقسات بەرگەن.

«ول ءتىپتى انىقتاما دا كورسەتتى. سپورتشى بىلاي دەسە، باس باپكەر وسىلاي دەيدى، دەگەنمەن سوڭعى ءسوز باپكەردىڭ ەنشىسىندە بولاتىنى انىق قوي»، - دەيدى دەنيس جارمەنوۆ. - مەنىڭ جەكە پىكىرىم: داۋلەتتىڭ كوماندادا بولماۋى، قازاقستانعا كەرى اسەرىن تيگىزەدى. ارينە، باس باپكەر ءوزى بىلەدى عوي، كوماندا سونىڭ قولىنىڭ استىندا. وليمپيادا ويىندارى بارلىعىن كورسەتەدى، ءبىراق كوماندالىق قايىق، وندا باستىسى - جۇمىستىڭ بىركەلكى ورىندالۋى. بۇل ءبىرىن- ءبىرى تانىعان، ازيا ويىندارىندا جۇلدە العان، بىرگە دايىندالدى، بىرگە قاتىسقان مىقتى ەكيپاج ەدى».

 وسىلايشا، قازاقستان بايراعىن يليا گولەندوۆ، اندرەي ەرگۋچەۆ، الەكساندر ەمەليانوۆ پەن سەرگەي توكارنيتسكيي جەلبىرەتپەك.

د. جارمەنوۆتىڭ سوزىنە قاراعاندا، بارلىق سپورتشىلار ءوز بابىندا.

«قۇراما ەنشىسىندە بارلىق جارىستاردان: ازيا ويىندارىنان، الەم كۋبوگىنەن، الەم چەمپيوناتىنان جۇلدەلەر بار. وليمپيادا ويىندارىنىڭ مەدالدارى عانا جەتىسپەيدى. ءبىز جوسپارلى تۇردە قادام باسىپ كەلەمىز، ءبىزدىڭ سپورت قارقىن الا باستادى»، - دەيدى ول. - كوماندانىڭ ىشىندە، مەنىڭ ويىمشا، كانوەدە ەسكەك ەسۋدەن 200 مەترلىك سپرينتەرلىك قاشىقتىقتا ەل نامىسىن قورعايتىن تيمۋر حايداروۆ ەرەكشەلەنەدى. الدىنعى الەم كۋبوگىندە ول وليمپيادا چەمپيونىن باسىپ وزىپ، التىن مەدال ەنشىلىگەن. سوندىقتان وعان ۇلكەن ءۇمىت ارتىلۋدا، مەدال تۋرالى ايتپاي- اق قويايىن، دەگەنمەن مەنى ناعىز نامىسشىل جىگىت دەپ بىلەمىن».

 ايتا كەتۋ كەرەك، وقو ەلىمىزدە ەسكەك ەسۋ سپورتىن دامىتۋدا كوشباسشىسى وبلىس سانالادى. بىلتىر مۇندا سپورت بازاسى اشىلدى. وندا قازاقستاندىقتار جىل بويى جاتتىعۋ جاساي الادى.

 ەسكەكشىلەر وليمپيادا ويىندارىندا 15 -تامىزدان باستاپ ونەر كورسەتەدى.

 اۆتور: جاسۇلان جولدىبايەۆ