استانالىقتار قازاقستاندىق وليمپيادا قۇراماسىنا ريو- دە- جانەيرودا ساتتىلىك تىلەدى

استانا. قازاقپارات - استانا تۇرعىندارى ريو- دە- جانەيرودا ەل نامىسىن قورعايتىن سپورتشىلارعا قولداۋ ءبىلدىرۋ ماقساتىندا اسپانعا اۋە شارىن ۇشىردى.

ەندى بەس كۇننەن كەيىن الەمدەگى ەڭ اسەم قالالاردىڭ ءبىرى - ريو- دە- جانەيرودا XXXI جازعى وليمپيادا ويىندارى باستالادى.

 ءتورت جىلدا ءبىر رەت وتەتىن بايراقتى جارىسقا الەمنىڭ 206 ەلى قاتىسادى. قازىرگى تاڭدا قازاقستاندىق سپورتشىلار وليمپيادا قالاشىعىنا ورنالاسىپ، دايىندىقتارىن باستاپ كەتتى. ال، بۇگىن استانا قالاسىندا وسى وليمپياداعا وراي ەرەكشە شارا ۇيىمداستىرىلدى. قازاقستان رەسپۋبليكاسىنىڭ ۇلتتىق وليمپيادالىق كوميتەتى بىرەر كۇننەن كەيىن وليمپيادا باستالاتىنىن ەسكە سالۋ جانە سول جەردە ەل نامىسىن قورعايتىن سپورتشىلارعا قولداۋ ءبىلدىرۋ ماقساتىندا اۋە شارىن ۇشىردى.

«سپورتشىلارعا ساتتىلىك تىلەۋدىڭ كەرەمەت شاراسى بولدى. بۇگىن وسى جەرگە وتباسىمدى الا كەلدىم. وليمپيادانىڭ باستالۋىنا ساناۋلى كۇندەر قالدى. سپورتشىلارعا جانكۇيەر بولىپ، ارينە قولداۋ جاسايمىز. وليمپيادا ويىندارى بۇكىل ەلدى بىرىكتىرەتىن ەرەكشە شارا. ءبىزدىڭ سپورتشىلار بار ونەرلەرىن ورتاعا سالىپ، جەڭىس تۇعىرىنان كورىنەدى دەپ سەنەمىز»، - دەيدى قالا تۇرعىنى ادىلەت قامباروۆ.

«العا، قازاقستان!» اتتى جازۋ جازىلعان، ق ر ۇلتتىق وليمپيادالىق كوميتەتىنىڭ لوگوتيپى بار اۋە شارى «حان شاتىر» ويىن- ساۋىق ورتالىعى جانىنداعى الاڭنان كوتەرىلدى.

ريو- دە- جانەيروداعى 2016 -جىلعى وليمپيادا ويىندارىندا قازاقستاننان 100-دەن استام سپورتشى اتتاندى. ولاردىڭ بارلىعى دەرلىك جاقسى دايىندىق جۇرگىزىپ، XXXI جازعى وليمپيادا ويىندارىنىڭ جۇلدەلەرى ءۇشىن كۇرەسۋگە دايىن.

اۆتور: كۇنسۇلتان وتارباي