ايدوس سارىم قازاق- تۇرىك ليتسەيلەرىن «الاش ليتسەيلەرى» دەپ اتاۋدى ۇسىندى
قازاق- تۇرىك ليتسەيلەرى قازاقتىڭ مەملەكەتتىك مۇددەسىنە، بولاشاعىنا ىستەپ جاتىر. مەملەكەتتىك ستاندارتپەن. ەگەر بىرەۋلەردىڭ تاقياسىنا تار كەلسە، وندا ولاردى الاش ليتسەيلەرى دەپ اتالىق. الاش قازاقتان دا كەڭ ۇعىم. الداعى جىلى الاشوردانىڭ ءجۇزجىلدىعى دا كەلە جاتىر دەگەندەي»، - دەدى ول.
ءوز كەزەگىندە جۋرناليست اۋەسبايدىڭ قاناتى قازاق- تۇرىك ليتسەيلەرىن جابۋعا بولمايتىنىنا بەس سەبەپ كەلتىردى. ءوز باسىم قازاق- تۇرىك ليتسەيلەرىن جابۋعا قارسىمىن. جيىرما جىلدان اسا ۋاقىتتا ءبىلىم تۇرعىسىنان تەك پايداسى بولماسا ەش زيانى بولعان جوق. جابۋعا بولمايتىنىنا بەس سەبەپ كەلتىرەيىن. 1. بۇگىندە قازاق-تۇرىك ليتسەيى دەگەن اتى بولماسا، وندا تۇركياعا قاتىستى ەشتەڭە جوق. ءتىپتى، تۇرىك ءتىلى ءپان رەتىندە وقىتىلمايدى دا. تەك فاكۋلتاتيۆ قانا. ياعني، وقۋشىلار تۇرىك ءتىلىن قالاسا وقيدى، قالاماسا وقىمايدى دەگەن ءسوز. ماسەلە اتىندا عانا بولسا، وندا قازاق تەحنيكالىق ليتسەي دەپ وزگەرتۋگە بولادى. 2. مۇعالىمدەردىڭ باسىم كوپشىلىگى قازاقستاننىڭ ازاماتتارى. ليتسەي ديرەكتورلارىنىڭ بىرەن-سارانى بولماسا كوپشىلىگى ءبىزدىڭ ەلدىڭ ازاماتتارى. 3. قازاق-تۇرىك ليتسەيلەرىن تۇركيا ۇكىمەتى ەمەس، قازاقستان ۇكىمەتى قارجىلاندىرادى. 4. قازاق-تۇرىك ليتسەيلەرى ەڭ باستىسى، قازاقستاننىڭ ءبىلىم بەرۋ ستاندارتى بويىنشا وقىتادى. بۇل وتە ماڭىزدى. ماسەلەنكي، ءبىز بىلەتىن استانا مەن الماتىدا جۇمىس ىستەيتىن حەيلي بەيري مەكتەپتەرى قازاقستاننىڭ ءبىلىم بەرۋ ستاندارتىن پىسقىرماپتى دا. 5. جالپى رەيتينگ بويىنشا ەلىمىزدەگى ءبىلىم بەرۋ مەكەمەلەرى اراسىندا قازاق- تۇرىك ليتسەيلەرى ءبىرىنشى ورىندا»، - دەپ جازدى ول Facebook جەلىسىندەگى پاراقشاسىندا.
ايتا كەتەيىك، تۇركيانىڭ استاناداعى وكىلەتتى ەلشىسى نيەۆزيات ۋيانىك قازاق- تۇرىك ليتسەيلەرىنىڭ جانە جوعارى وقۋ ورىندارىنىڭ تۇركيا ۇكىمەتىنە ەش قاتىسى جوق ەكەنىن ايتىپ، توڭكەرىس ارەكەتى بولعاننان كەيىن تۇركيانىڭ بارلىق دوستاستىق ەلدەرىنەن قولداۋ كۇتەتىنىن مالىمدەگەن ەدى. ول دوستاستىق ەلدەرگە قاراتا ءسوز ايتقان ەدى. «توڭكەرىس ارەكەتى ەلىمىزدىڭ دەموكراتيالىق تىرەۋىنە باعىتتالدى، ول ءبىزدىڭ ۇكىمەتتى قۇلاتۋعا باعىتتالدى، ال ءبىر تۇسىنان بۇل ارەكەت باسقا ەلدەرگە دە ەسكەرتۋ. ورگاندار قاجەتتى شارالاردى جۇرگىزۋدى باستايدى دەپ سەنەمىن. ءبىز قازاقستان رەسپۋبليكاسىمەن تىعىز بايلانىستامىز، ارىپتەستىكتەمىز. بۇل تۇركيا مۇددەسى عانا ەمەس، بۇل ماسەلەلەر قازاقستان رەسپۋبليكاسىنىڭ مۇددەسىنە دە قاتىستى»، - دەگەن ەدى ەلشى.
بۇدان كەيىن قازاقستاننىڭ ءبىلىم جانە عىلىم مينيسترلىگى وسى جاعدايعا بايلانىستى رەسمي ۇستانىمىن جاريا ەتىپ، مالىمدەمە جاسادى.
