بۇدان بىلاي بانكتەر كەپىلگە قويىلعان باسپاناڭىزدى تارتىپ المايدى
بارىم وسى دەپ باسىنداعى ءبىر عانا باسپاناسىن كەپىلگە قويعاندار بۇدان بىلاي پاتەرىمنەن ايىرىلىپ قالام- اۋ دەپ الاڭدامايدى. بانك ءوز تۇتىنۋشىلارىمەن اراداعى كەلىسىم شارتقا وزگەرتۋلەر ەنگىزىپ، قينالعان حالىقتىڭ كوڭىلىنە تاعى ءبىر دەمەۋ بولىپ جاتىر.
بۇعان دەيىن سوت ارقىلى ۇيلەرىن كەپىلگە قويعان ازاماتتاردى سول ۇيىنەن كۇشتەپ شىعارىپ كەلگەن. وسىنى توقتاتۋ ءۇشىن ۇلتتىق بانك، ەكىنشى دەڭگەيلى بانكتەر مەن الماتى اكىمدىگى، قوعامدىق بىرلەستىكتەر ءتورتجاقتى مامىلەگە قول قويدى. ياعني، بۇدان بىلاي 3 اي مەرزىم ىشىندە نەسيەسىن قايتارا الماي جۇرگەندەر بانككە كەلىپ، باسىنداعى جاعدايىمەن ءبولىسۋى ءتيىس. الايدا، بۇل بورىشكەر نەسيەسىن تولەمەيدى دەگەن ءسوز ەمەس. تەك شاماسىنا قاراي تولەۋ شارتتارى جۇمسارتىلادى.
قازىرگى تاڭدا ەلىمىز بويىنشا انە-مىنە ۇيىنەن قۋىلۋعا شەشىم شىعارىلىپ قويعان 40 مىڭعا جۋىق وتباسى بار. ال ءتورتجاقتى قول قويىلعان قۇجات وسى تۇيتكىلدى شەشۋگە سەپتىگىن تيگىزەدى دەيدى ۇلتتىق بانك وكىلدەرى.
«بورىشكەر ءوز ەركىمەن بانككە كەلىپ، قارجىلىق قيىندىقتارى بارىن اشىق ايتۋى ءتيىس. وسىلاي بولا تۇرا، قارىزىن وتەۋدەن باس تارتپايتىندىعىن تانىتسا، بانك وكىلدەرى وعان تۇسىنىستىكپەن قاراپ، ءار بورىشكەرگە قارىزدى وتەۋدىڭ جولدارىن بىرلەسىپ قاراستىراتىن بولادى» - دەيدى ۇلتتىق بانكتىڭ باسقارما باسشىسى الەكساندر تەرەنتيەۆ.
