مەن تاعدىردىڭ سوققىسىن قابىلدايمىن، ءبىراق ونى تۇسىنە المايمىن - ە. شاكەيەۆ

الماتى. قازاقپارات - مەن تاعدىردىڭ سوققىسىن قابىلدايمىن. ءبىراق ونى تۇسىنە المايمىن. بۇل اقىلعا سىيمايدى.

بۇگىن الماتىدا ۇلى سافار شاكەيەۆتى اقتىق ساپارعا شىعارىپ سالۋعا بايلانىستى وتكەن قارالى جيىن بارىسىندا مارقۇمنىڭ اكەسى ەركەش شاكەيەۆ وسىلاي دەدى.

 ول ءوزىن سىرتتاي بارىنشا بايسالدى ۇستاۋعا تىرىسقانىمەن، ىشتەي «اھ» ۇرىپ، وزەگى ورتەنىپ، كوپ سۇراقتارعا جاۋاپ ىزدەپ، شارق ۇرعانى سەزىلىپ تۇردى. بىرەسە ءوزىن اقتاعانداي، بىرەسە، ۇلىنىڭ رۋحى الدىنا كەشىرىم سۇراعانداي اسەر قالدىردى.

«مەن نەگىزى تاباندى اداممىن. تاعدىردىڭ بۇل سوققىسىن قابىلدايمىن، ءبىراق ونى تۇسىنە المايمىن. بۇل اقىلىما سيمايدى. بۇل جالعاندا جەر باسىپ، ءتىرى جۇرگەن كەزىڭدە پەرزەنتىڭنەن ايرىلعاننان اسقان قاسىرەت جوق. مەن ءوز باسىم، «ەشكىمدى رەنجىتپەي، ەشكىمنىڭ الا ءجىبىن اتتاماي، ەشكىمگە قيانات جاساماي تازا ءومىر ءسۇرىپ جاتىرمىن، مۇنداي قاسىرەتكە ۇشىراماسپىن» دەپ ويلايتىنمىن. امال قانشا!؟ سافار مەزگىلسىز قازاعا ۇشىرادى. ول مەزگىلسىز ۋاقىتتا، بارمايتىن جەرگە كەزدەيسوق بارىپ، وپات بولدى.

ءبىز ءبىر-ءبىرىمىزدى جاقسى تۇسىنەتىنبىز. كوپ سويلەسەتىنبىز. ونىڭ جوسپارى كوپ بولاتىن. سافار ادامدارعا ەرەكشە مەيىرىممەن قارايتىن جان ەدى. مەن ءبىر جولى وعان: «ەندى 1000 ادامنىڭ ىشىنەن ءبىر ادام ساعان رەنجىسە، ەشتەڭە ەتە قويماس» - دەپ ەدىم، ول: «اكە، ءبىر ادام دەگەن بۇل وتە كوپ قوي»، - دەپ جاۋاپ بەرگەنى بار. وتە وكىنىشتى. ءومىردى وزىڭە بەيىمدەي المايسىڭ. ومىرگە بەيىمدەلۋىڭە تۋرا كەلەدى. ءومىر ءوز زاڭدىلىعىمەن جىلجيدى. ەندى، سىزدەرگە ايتارىم، بالالارىڭىزدى قورعاي بىلىڭىزدەر. بالالارىڭىز شىن دوس ارتتىرۋلارى ءۇشىن، ادام تاني ءبىلسىن. مەن سافارمەن قوشتاسپايمىن. بۇل جونىندە مەنىڭ ءوز جوسپارىم بار. نۇكتەسىن قوياتىن جايتتەر بار. بارلىعىڭىزعا راحمەت»، - دەدى ە. شاكەيەۆ.

اۆتور: ايبوتا جاپپاربەرگەن