قازاقستاندىق سپورتشىلاردىڭ ريو وليمپياداسىندا كيەتىن سپورتتىق كيىمدەرىنىڭ تۇپكىلىكتى نۇسقاسى تانىستىرىلدى - فوتورەپورتاج
كەيبىر سپورتشىلارىمىز برازيلياعا اتتانىپ تا كەتتى. قالعاندارى جولعا دايىندالىپ جاتىر. قازاقستاننىڭ وليمپيادالىق قۇراما كومانداسى بۇل جولى 78838 ورىندى ماراكانا ستاديونىندا وتەتىن وليمپيادانىڭ اشىلۋ ءراسىمى اياسىندا بولاتىن سالتاناتتى شەرۋگە قانداي كيىممەن شىعادى؟
«قازاقپارات» ءتىلشىسى وسىعان بايلانىستى «كازسپو- N» ج ش س باس ديرەكتورى ەلەنا سۆەچنيكوۆانى اڭگىمەگە تارتتى. ويتكەنى، قازاقستان قۇراماسىنىڭ سپورتتىق فورماسىن «Zibroo» برەندىمەن «كازسپو - N» كومپانياسى تىگەدى. ال سالتاناتتى شەرۋگە كيەتىن كيىمدى «كازلەگپروم- الماتى» ج ش س ازىرلەيدى.
- ەلەنا الەكساندروۆنا، سپورتتىق فورمانى ازىرلەۋ جانە تىگۋ ۇدەرىسى قالاي باستالدى؟
- بۇل سالادا ءبىزدىڭ تاجىريبەمىز مول. ءبىز وسىنداي ۇلكەن تاپسىرىستى 2011 -جىلى VII قىسقى ازيا ويىندارى قارساڭىندا ورىندادىق. ۇيىمداستىرۋشى كوميتەت پەن كوماندانى جابدىقتادىق. كەلەسى ماڭىزدى جانە ءساتتى كەزەڭ 2014 -جىلى بولدى. بۇل جىلى ءبىز ۇلتتىق قۇرامانى سوچيدەگى قىسقى وليمپيادا ويىندارىنا قاتىستى سپورتتىق كيىم-كەشەكپەن جابدىقتادىق.
ءبىزدىڭ كيىم ۇلگىلەرىمىز قازاقستان تاريحىندا تۇڭعىش رەت، بارلىق ەلدەر اراسىندا ەڭ ۇزدىك كيىم- كەشەكتەردىڭ تورتتىگىنە ءىلىندى.
«ازيا ويىندارى-2014» توپتاماسى ينچحون قالاسىنداعى (كورەيا) ازيا ويىندارى مەن قىتايدا وتكەن جاستار اراسىنداعى وليمپيادا ويىندارىندا كوپشىلىك نازارىنا ۇسىنىلدى.
سول جىلى تۇرعىندارعا ارنالعان بۇكىلالەمدىك 28- قىسقى ۋنيۆەرسيادا ويىندارىنىڭ بەينەلەمەسى بار كيىمدەر توپتاماسىن ازىرلەۋ جانە تىگۋ بويىنشا ليتسەنزيالىق كەلىسىمگە قول قويىلدى.
ءبىز ءوز ەركىمىزبەن وتكەن جىلى جاز ايىندا ق ر مادەنيەت جانە سپورت مينيسترلىگىنە، شتاتتىق ۇلتتىق كوماندالار ديرەكسياسىنا قازاقستان قۇراما كومانداسىن ريو وليمپياداسىنا ارناپ كيىم- كەشەكپەن قامتاماسىز ەتۋ جايىندا ساۋال جولدادىق.
ءبىز پىكىرىمىزبەن ءبولىسىپ، شامامەن 15 شاقتى نۇسقانى كورسەتتىك.
بارلىق توپتامانى ءوزىمىز جاساپ، مادەنيەت جانە سپورت مينيسترلىگىنە جونەلتتىك. بۇل شاراعا باسقا قانداي كومپانيالاردىڭ قاتىسقانى، قالاي قاتىسقانى جانە اككرەديتتەۋدىڭ قالاي جۇرگىزىلگەندىگىنەن حابارىمىز جوق.
- سىزدەر ۇسىنعان فورما قالاي ماقۇلداندى؟ بۇل شاراعا كىمدەر قاتىستى؟
- بيىل بۇل سالاداعى جۇمىستار مەيلىنشە دۇرىس ۇيىمداستىرىلدى.
استانادا اتاقتى سپورتشىلار جانە استانا مەن الماتىدان بەيتاراپ ديزاينەرلەردىڭ قاتىسۋىمەن ارنايى كوميسسيا قۇرىلدى.
شەشىمدەر بىرلەسىپ، اقىلداسا وتىرىپ قابىلداندى. ءبىز ءار ءتۇرلى ەلدەردىڭ وليمپيادالىق قۇراما كوماندالارىنا ارناپ كيىم تىگۋگە قاتىسقان الەمدىك برەندتەردىڭ جۇمىستارىنا ساراپتاما جۇرگىزدىك.
ءبىز ءوز كەزەگىمىزدە وندىرىستىك كومپانيا رەتىندە كوميسسيانىڭ بارلىق تالاپ- تىلەكتەرىن ورىندادىق. ءسويتىپ، كوميسسيا كيىم- كەشەكتەردىڭ سوڭعى ۇلگىدەگى تۇجىرىمداماسىن ماقۇلدادى. تۇرعىنداردىڭ سىن پىكىرلەرىنەن كەيىن، كوميسسيا جانە مادەنيەت جانە سپورت مينيسترلىگى بىزگە «كوگىلدىر- سارى- اق» تۇستەر اياسىندا جۇمىس ىستەۋدى ۇسىندى. ديزايننىڭ جاڭا تۇجىرىمداماسىندا قازاقتىڭ ۇلتتىق ناقىشتاعى ويۋ- ورنەكتەرى قولدانىلدى. بۇل ورنەكتەر كوشپەلىلەردىڭ دۇنيەتانىمىن بىلدىرەدى، سوندىقتان قاسيەتتى ءارى ەستەتيكالىق ءمان- ماعىناعا يە. ولار سونداي-اق، ۇرپاق ساباقتاستىعىن بىلدىرەدى.
الماتىدا مەن ءوز باستاماممەن بەلگىلى وتاندىق ديزاينەرلەر: ايدا قاۋمەنوۆا، اياجان جاقسىباي، الەكسەي چجەن، ولگا ستان جانە وسى سالانىڭ باسقا دا ماماندارىن شاقىرىپ، ءبىزدىڭ وليمپيادالىق كيىمدەر بويىنشا ۇسىنعان ۇسىنىستارىمىزعا تاۋەلسىز ساراپتاما جاساۋعا شاقىردىق. سولاردىڭ بەرگەن باعالارىنىڭ نەگىزىندە ءبىز ۇزدىك ۇسىنىستاردى ىرىكتەپ الىپ، مادەنيەت جانە سپورت مينيسترلىگىنە جولدادىق. كەيىن القالى جيىندا ەڭ لايىقتى مودەلدى انىقتادىق. بۇل نۇسقا مامىر ايىنىڭ سوڭىندا ءبىرجولا بەكىتىلدى.
- شيكىزاتتار قايدان اكەلىنەدى جانە ولاردىڭ قانداي ارتىقشىلىقتارى، ەرەكشەلىكتەرى بار؟
- سپورت كيىمىنىڭ ساپاسى كوپ جاعدايدا تىگىلەتىن ماتاسىنا بايلانىستى. كاسىبي جانە ەكسترەمالدى سپورتتىڭ ءوز تالاپتارى بار. سپورتشىنىڭ ءومىرى مەن دەنساۋلىعى سول تالاپتاردى ورىنداۋعا تىكەلەي بايلانىستى. ريو- دە- جانەيرودا وليمپيادا ويىندارى بارىسىندا اۋا تەمپەراتۋراسى 30-40 گرادۋسقا كوتەرىلەدى. سوندىقتان، سپورت كيىمىنىڭ ماتاسى جەڭىل ءارى اۋا وتكىزەتىندەي بولۋى كەرەك. جەلدەن قورعايتىن كوستيۋمگە ءبىز اۋا وتكىزەتىن، ءبىراق، سۋ وتكىزبەيتىن ماتانى جانە CoolMax - اۋا تازارتقىش ەندىرمەسىن قولدانامىز. وسى Cоolmax-تان جاسالعان جەيدەلەر - سينتەتيكالىق ماتەريال - پوليەستەر بازاسىندا ازىرلەنگەن ماتادان تىگىلەدى. ول ىلعالدى تەز سىڭىرەدى جانە تەز كەبەدى. ءوزى جۇمساق، يكەمدى جانە ءپىشىنىن ساقتايدى. شولاق شالبارلار دا يكەمدى، سەرپىمدى ماتادان جاسالادى، ياعني Dabl Comb, 100% رolyester، CoolMax جەلدەتكىش ەندىرمەسى قولدانىلادى.
بۇل توپتامادا سونداي-اق، 100 پايىز ماقتادان تىگىلگەن مايكى، ياعني تەركوليەك بار. جاتتىعۋ جاساۋعا ارنالعان كيىمگە قۇرامىندا كوپ مولشەردە ماقتا بار جوعارى دارەجەدەگى يكەمدى ماتا قولدانىلادى.
ال شەرۋگە ارنالعان كيىم جۇقا پلاشتىق ماتادان تىگىلگەن. ماتانىڭ بارلىق ءتۇرى كوميسسيامەن الدىن الا كەلىسىلىپ الىندى.
شيكىزاتتى ءبىز تايۆاننان (90 پايىز) جەتكىزەمىز. ويتكەنى، ول جاقتا سپورتتىق كيىمدەرگە ارنالعان شيكىزات ءوندىرىسى كوپ ۋاقىتتان بەرى جاقسى جولعا قويىلعان. ماقتا نەگىزىنەن تۇركيادان جانە ازداعان بولىگى قىتايدان جەتكىزىلەدى. Zibroo كيىمىندە YKK اتتى جاپوندىق كومپانيانىڭ جوعارى ساپالى اساي- مۇسەيلەرىن قولدانامىز.
- ءبىر سپورتشىعا ارنالعان كيىمدەر جيناعىنا قانشا كيىم كىرەدى جانە باعاسى قانداي؟
- 14 بۇيىمنان تۇراتىن توپتاماعا: سالتاناتتى شەرۋدە كيەتىن كوستيۋم (سپورتشىلار بۇل كيىمدى ماراپاتتاۋ راسىمىنە دە كيەدى)، جاتتىعۋ كيىمى، جەلدەن قورعايتىن كوستيۋم، جاعاسى مەن جەڭى جوق جيلەت، جەيدە، شولاق شالبار، مايكا- پولو، كۇنقاعارى بار قالپاق - بەيسبولكا، شۇلىقتار، اياققا كيەتىن جەڭىل سۇيرەتپە- سلانسىلار، كروسسوۆكالار، سۇلگى، ريۋكزاك جانە سومكە كىرەدى. بۇكىل توپتامانىڭ باعاسى - 150 مىڭ تەڭگەدەي بولادى.
- ءسىز ءۇشىن قازاقستاننىڭ وليمپيادالىق قۇراما كومانداسىنا كيىم تىگۋ قانداي مانگە يە؟
- بۇل مەيلىنشە كۇردەلى جانە جاۋاپتى جوبا. سونىمەن قاتار، ۇلتتىق قۇرامانى كيىندىرۋ ءبىز ءۇشىن ۇلكەن مارتەبە.
ZIBROO كومانداسى قازاقستاننىڭ وليمپيادالىق قۇراما كومانداسىنا ەل نامىسىن قورعاۋدا جەڭىسكە جەتۋلەرىنە شىن جۇرەتەن تىلەكتەستىگىن بىلدىرەدى. ءبىز كومانداعا ساتتىلىك تىلەيمىز جانە ولارعا سەنىم ارتامىز!
- ءبىزدىڭ سپورتشىلار سپورتتىق كيىمنىڭ ادەمى ءارى ىڭعايلى بولۋى پسيحولوگيالىق تۇرعىدا وتە ماڭىزدى ەكەندىكتەرىن ايتادى. ويتكەنى كيىم ارقىلى دا ەلدى بۇكىل الەمگە لايىقتى دارەجەدە تانىتقىلارى كەلەدى. وسى جونىندە نە ايتار ەدىڭىز؟
- مەن بۇل پىكىرمەن تولىق كەلىسەمىن. ويتكەنى، الەمدىك سپورت مەرەكەسى سپورتشى ومىرىندەگى ەڭ جاۋاپتى كەزەڭ.
سوندىقتان، كوميسسيا قۇرامىندا كاسىپقوي سپورتشىلار بولدى. كيىمنىڭ ۇلگىسى، ءتۇسى، ساپاسى، قولدانىلاتىن شيكىزاتىنا قاتىستى ولاردىڭ تىلەكتەرى تولىعىمەن ەسكەرىلدى.
- اڭگىمەڭىزگە راحمەت.
انىقتاما: Zibroo - بالالار مەن ەرەسەكتەرگە ارنالعان قازاقستاندىق سپورت كيىمىنىڭ ساۋدا بەلگىسى. Zibroo ساۋدا بەلگىسىنىڭ تاريحى 1996 -جىلدان باستالادى. سول جىلى كازسپو- N كومپانياسى قۇرىلدى. ول العاشقى كەزەڭدە ارناۋلى ماقساتتاعى كيىمدەر شىعاردى. ZIBROO ساۋدا بەلگىسى سوڭعى جىلدارى قازاقستان عانا ەمەس، جاقىن شەت ەلدەرگە دە تانىمال بولا باستادى.
كومپانيانىڭ وندىرىستىك الاڭى - 6000 شارشى مەتردى قۇرايدى. كومپانيادا 200 شاقتى ادام جۇمىس ىستەيدى.
اۆتور: ايبوتا جاپپاربەرگەن
