قونايەۆ قۇرمەت تۇتقان قوعام قايراتكەرى سۇلتان جيەنبايەۆ
سۇلتان سۇلەيمەن ۇلى وتان سوعىسىنىڭ ارداگەرى. ول مايدانعا ءوز ەركىمەن اتتاندى. 1941 - جىلدىڭ قىسىندا الماتىدا جاساقتالعان 100-دەربەس اتقىشتار بريگاداسىنىڭ قۇرامىندا جاۋمەن شايقاستى. شايقاس بارىسىندا بىرنەشە رەت اۋىر جارالاندى. وسىنىڭ سالدارىنان 1944 - جىلى ەلگە ورالدى.
ەلگە كەلگەن سوڭ تۇركىستان - ءسىبىر تەمىرجولىنىڭ جۇمىسشىلاردى جابدىقتاۋ باسقارماسىندا ەڭبەك ەتتى. ول قاراپايىم تەكسەرۋشىدەن ءبولىم باستىعى، باسقارما باستىعىنىڭ ورىنباسارى دەڭگەيىنە دەيىن ءوستى.
1950 - جىلى ك س ر و ساۋدا مينيسترلىگىنىڭ جوعارعى ساۋدا مەكتەبىنە وقۋعا جىبەرىلىپ، ونى بىتىرگەننەن كەيىن قازاق ك س ر ساۋدا مينيسترلىگىنىڭ وندىرىستىك تاۋارلار باسقارماسىنىڭ باستىعى قىزمەتىنە بەكىتىلدى. مۇنان سوڭ ك س ر و باس ۋنيۆەرماگىنىڭ الماتى ورتالىق ۋنيۆەرماگىنا ديرەكتور بولدى. بۇدان كەيىنگى قىزمەتى پارتيا سالاسىندا جالعاستى. ارادا كوپ ۋاقىت وتپەي الماتى قالاسىنداعى فرۋنزە اۋپارتكومىنىڭ ءبىرىنشى حاتشىلىعىنا سايلاندى. ال 1962 -جىلى ەلىمىزدىڭ ساۋدا ءمينيسترى بولدى.
رەسپۋبليكا مينيسترلەر كەڭەسى ءتوراعاسىنىڭ ورىنباسارى قىزمەتىن دە ابىرويلى اتقارا ءبىلدى.
سۇلتەكەڭنىڭ حالقىمىزدىڭ ارداقتى پەرزەنتى دىنمۇحامەد قونايەۆپەن تانىستىعى فرۋنزە اۋپارتكومىندا قىزمەت ىستەپ جۇرگەندە باستالدى. قالالىق پارتيا كونفەرەنسياسىنا د. قونايەۆ تا قاتىسىپ وتىرعان. ءسوز العان سۇلتان سۇلەيمەن ۇلى قالادا جانە ءوزى باسقاراتىن اۋداندا جۇيەسىز ءجۇرىپ جاتقان قۇرىلىس ءۇشىن قالانىڭ باس ساۋلەتشىسى ي. بەلەسەلكوۆسكيدى قاتتى سىنعا الدى. بۇل ورىندى سىن ەدى.
ءسىرا، سۇلتەكەڭنىڭ القالى جيىندا سويلەگەن ءسوزى ديمەكەڭنىڭ كوڭىلىنەن شىققان بولۋ كەرەك، ءبىر ايدان كەيىن قابىلداۋىنا شاقىردى. جاڭا قىزمەت ۇسىندى. ورتالىق كوميتەتتىڭ جوسپارلاۋ، قارجى بولىمىنە باسشىلىققا بەكىتەتىنىن ايتتى. بۇل بولسا جاستىعىن ءارى قىزمەتتىڭ جاۋاپكەرشىلىگى مول ەكەنىن العا تارتىپ، قاشقاقتاعان بولىپ ەدى، ديمەكەڭ: «ۇركەتىن ەشنارسە جوق. ءسىزدىڭ جاسىڭىزدا ۇكىمەت ءتوراعاسىنىڭ ورىنباسارى قىزمەتىن اتقارعانمىن» دەدى. سودان امالسىز كەلىسكەن.
سۇلتەكەڭ ساۋدا ءمينيسترى بولعان كەزەڭدە ساۋدا ورىندارىنىڭ ماتەريالدىق بازاسىن نىعايتۋعا باسا كوڭىل ءبولدى. جاڭا ساۋدا، قوعامدىق تاماقتاندىرۋ ورىندارى پايدا بولدى. ولاردىڭ قاتارىندا «الماتى مەيرامحاناسى»، «راحات»، «يۋبيلەينىي» گاسترونومدارى، «ۋنيۆەرسام» ، «بالالار الەمى» امبەباپ دۇكەنى، «وكەان» دۇكەندەرى بار. جاڭادان ساناتوريلەر سالىندى. ولار ءالى كۇنگە دەيىن حالىققا قىزمەت ەتۋدە.
سۇلتەكەڭ زەينەتكەرلىككە شىققاننان كەيىن دە بوس وتىرا المادى. ديمەكەڭنىڭ ۇسىنىسىمەن ەلدەگى تاريحي جانە مادەني ەسكەرتكىشتەردى قورعاۋ قوعامىن باسقاردى. ونىڭ باسشىلىعىمەن كوپ ەسكەرتكىشتەر جاڭارتىلدى، ەسكەرتكىشتەردىڭ ەسەبى جولعا قويىلدى.
جالپى ديمەكەڭ مەن سۇلتەكەڭنىڭ اراسىندا جاقسى قارىم- قاتىناس بولدى. ەكى شاڭىراق ءبىر- بىرىمەن كورشى تۇردى. العاشقىدا ديمەكەڭ سۇلتاندى پاتەرىنە شاقىرىپ، زايىبى زۋحرا شارىپ قىزىمەن تانىستىردى. سول كەزدە ديمەكەڭنىڭ ۇيىندە اتا- اناسى قوناققا كەلگەن. ولار كەشەگى ۋاقىتتارى سۇلتاننىڭ اكە- شەشەسىمەن كورشى بولعان ەكەن. وتكەن جىلداردى ەسكە الىپ، قاۋقىلداسىپ قالادى.
كەيىن سۇلتان ديمەكەڭدى زايىبىمەن ۇيىنە شاقىرىپ، قوناق ەتەدى. زۋحرا ءشارىپ قىزى جاس كەزىندە اتا- اناسىمەن پەتروپاۆلدا تۇرعان ەكەن. سۇلتاننىڭ جۇبايى نۇرانيا دا نەگىزىنەن سول قالادان. وسىلاي ارالاس- قۇرالاستىق جالعاسا بەرەدى.
باستاماشىل توپ قونايەۆتىڭ قازاقستان ەكونوميكاسىن، عىلىمى مەن مادەنيەتىن دامىتۋداعى، سونداي- اق ونىڭ حالىقارالىق كولەمدەگى جوعارى بەدەلىن ەسكەرە وتىرىپ، ارداقتى ازاماتتىڭ اتىندا قور قۇرۋعا ۇيىتقى بولعان ەدى. د. قونايەۆتىڭ ءوتىنىشى بويىنشا قورعا سۇلتان سۇلەيمەن ۇلى باسشىلىق ەتتى. قوردىڭ تۇساۋكەسەرىنە د. قونايەۆتىڭ ءوزى قاتىستى. كەيىنىرەك قور بولىمشەلەرى ەلىمىزدىڭ وزگە دە وڭىرلەرىندە اشىلدى. ءسويتىپ، ول حالىقارالىق مارتەبەگە يە بولدى.
سۇلتەكەڭ ادىلدىكتى، ادالدىقتى سۇيەتىن ازامات. ەل الدىنداعى قىزمەتىن ابىرويمەن اتقاردى. ءبىز ەل اعاسىمەن وتباسىلىق قارىم- قاتىناستامىز. سۇلتەكەڭ جانە ول كىسىنىڭ زايىبى نۇرانيا پەرەي قىزى ءبىزدىڭ وتباسىمىزدى، اسىرەسە ناعيما سماعۇل قىزىن ايرىقشا قۇرمەت تۇتادى.
عيبراتتى عۇمىر كەشىپ كەلە جاتقان سۇلتان سۇلەيمەن ۇلىنا جانە ونىڭ وتباسىنا جاقسىلىقتار تىلەيمىز. تۋعان ەلىنىڭ يگىلىگى ءۇشىن قىزمەت ەتۋدەن باقىت تاپقان سۇلتەكەڭدەي جاندار ارامىزدا كوپ بولعاي!
«انا ءتىلى» گازەتى
