دانيار ەلەۋسىنوۆ قانات يسلاممەن وتكەن سپاررينگ جاتتىعۋ پايدالى بولعانىن ايتتى
«وزدەرىڭىز ەستىپ، ءبىلىپ جاتقانداي سوڭعى جاتتىعۋىمىز استانادا ءوتتى. دايىندىعىم جامان ەمەس. استانادا تانىمال كاسىپقوي بوكسشى قانات يسلام اعامىزبەن سپاررينگ جاتتىعۋلار وتكىزدىم. ونىڭ بارلىعى ماعان وڭ ناتيجە بەردى. شەبەرلىگىمدى شىڭداۋعا كومەكتەستى»، - دەپ اتاپ ءوتتى ەلەۋسىنوۆ.
سونداي- اق، 69 كەلى سالماقتىڭ جۇگى اۋىر ەكەنىن ايتىپ، ريو- دە- جانەيرو وليمپياداسىندا ەل ءۇمىتىن اقتاۋعا بار كۇش- جىگەرىن سالاتىنىن دا ەستەن شىعارمادى.
«قازاق بوكسشىلارى سوڭعى ءۇش وليمپيادادا التىن الدى. مەن لوندون وليمپياداسىندا باسقا سالماقتا ونەر كورسەتتىم. بيىل ەكىنشى وليمپيادامدا «قازاقتىڭ مەنشىكتى سالماعى» 69 كەلىدە ونەر كورسەتۋگە اتتانىپ بارامىن.
بۇل سالماققا قويىلاتىن تالاپ وتە اۋىر ەكەنىن بىلەمىن. جاقسى تۇسىنەمىن.
ەگەر مەن التىن الماسام، ءداستۇرلى جول بۇزىلاتىنىن دا جاقسى بىلەم. ويتكەنى، وسى سالماقتا قازاق بوكسشىلارى وليمپيادا ويىندارىندا ءۇش التىن العان. سوندىقتان، بار كۇش- جىگەرىمدى سالىپ، جەڭىس تۇعىرىنىڭ بيىك ساتىسىنان كورىنۋگە تىرىسامىن»، - دەدى دانيار ەلەۋسىنوۆ.
بوكسشىلاردى استانا اۋە جايىنان اتتاندىرىپ سالۋعا بوكسشىلاردىڭ تۋىس- تۋعاندارى، اعايىن- دوستارى جانە جەرگىلىكتى جانكۇيەرلەر مەن بىرگە ب ا ق وكىلەرى قاتىسىپ، ءسات- ساپار تىلەدى.
ەرلەر قۇراماسى مەن ايەلدەر قۇراماسى قۇرلىقتىڭ ارعى بەتىنە بىرگە اتتاندى.
اۆتور: كۇنسۇلتان وتارباي
