بويى ۇزىن ايەلدەر مەن ەرلەر تۇراتىن مەملەكەتتەر انىقتالدى

استانا. قازاقپارات - لاتۆيالىق ايەلدەر مەن گوللانديالىق ەرلەر جەر بەتىندەگى ەڭ ۇزىن جاندار.

NCD Risk Factor كوللابوراتسياسىنىڭ عالىمدارى جاساعان سوڭعى زەرتتەۋدىڭ ناتيجەسى وسىنداي، دەپ حابارلادى The Guardian گازەتى.

عالىمداردىڭ انىقتاۋىنشا، لاتۆيا ايەلدەرىنىڭ ورتاشا بويى 168 سانتيمەتردى قۇرايدى، ال نيدەرلاندتىق ەرلەردىڭ ورتاشا بويى 182,5 سانتيمەتر ەكەن. بۇل زەرتتەۋ سوڭعى 100 جىلدا الەمنىڭ 187 ەلىندەگى ادامداردىڭ بويى ۇزارىپ جاتقانىن دالەلدەگەن. ماسەلەن، يرلاندياداعى ەرلەردىڭ بويى 1914-جىلدان باستاپ، شامامەن 16 سانتيمەترگە ۇزارعان. ال ايەلدەر اراسىندا وڭتۇستىك كورەيالىق نازىك جاندىلاردى مىسال ەتىپ الۋعا بولادى. سوڭعى 100 جىلدا ولاردىڭ بويى 20 سانتيمەرگە وسكەن.

زەرتتەۋ ناتيجەسىنە سايكەس، بەلگيا، لاتۆيا، ەستونيا، دانيا ەرلەرىن دە ۇزىن بويلىلاردىڭ قاتارىنا جاتقىزۋعا بولادى. ال ەڭ الاسا ەرلەر شىعىس تيموردا تۇراتىن بولىپ شىقتى. ەڭ ۇزىن ايەلدەرى بار ەلدەر - نيدەرلاندى، ەستونيا، چەحيا ەكەن. ال گۆاتەمالا ايەلدەرىنىڭ بويى ەڭ قىسقا، سوڭعى 100 جىلدا 10 سانتيمەترگە ۇزارعانىن ەسەپكە الساق، ولاردىڭ قازىرگى ورتاشا بويى - 150 سانتيمەتر.

زەرتتەۋشىلەر، جەر بەتىندەگى ايەلدەرگە قاراعاندا ەرلەردىڭ بويى 12 سانتيمەترگە ۇزىن ەكەنىن انىقتادى.

ەرتەرەكتە افريكا كونتينەنتىنىڭ تۇرعىندارى بيىك دەپ سانالاتىن. ءبىراق زەرتتەۋشىلەر افريكا مەن تاياۋ شىعىس ەلدەرى حالقىنىڭ سوڭعى بىرنەشە ونجىلدىقتا تومەندەپ كەتكەنىن ايتۋدا.