نۇرسۇلتان نازاربايەۆ قىتاي حالىق رەسپۋبليكاسىنىڭ ءتوراعاسىنا ەلدە بولعان سۋ تاسقىنىنا بايلانىستى كوڭىل ايتتى

استانا. قازاقپارات - قازاقستان پرەزيدەنتى نۇرسۇلتان نازاربايەۆ قىتاي حالىق رەسپۋبليكاسىنىڭ ءتوراعاسى شي جينپيڭگە ەلدە بولعان سۋ تاسقىنىنا بايلانىستى كوڭىل ايتۋ جەدەلحاتىن جولدادى.

بۇل تۋرالى اقوردانىڭ باسپا ءسوز قىزمەتىنەن حابارلادى.

مەملەكەت باسشىسى قىتايدىڭ ءبىرقاتار پروۆينسياسىندا كوپتەگەن ادامنىڭ ءومىرىن الىپ كەتكەن سۋ تاسقىنى تۋرالى سۋىت حاباردى زور كۇيزەلىسپەن قابىلدادى.

قازاقستان پرەزيدەنتى اۋىر قايعىعا ورتاقتاسا وتىرىپ، دۇلەي اپاتتان قازا بولعانداردىڭ تۋىستارى مەن جاقىندارىنا كوڭىل ايتتى.

بۇدان بولەك، نۇرسۇلتان نازاربايەۆ سۋ تاسقىنى سالدارىن تەزىرەك جويىپ، زارداپ شەككەندەردىڭ تەزىرەك ساۋىعىپ كەتۋىنە تىلەكتەستىك ءبىلدىردى.