13:43, 26 - شىلدە 2016 | GMT +6
قۇتقارۋشىلار اداسىپ قالعان ەكى نورۆەگيالىقتى الماتى ىرگەسىندەگى تاۋدان تاپتى
الماتى. قازاقپارات - قۇتقارۋشىلار الماتى ىرگەسىندەگى تاۋ بوكتەرىنەن اداسىپ كەتكەن ەكى نورۆەگيالىق ازاماتتى تاپتى.
بۇل تۋرالى بۇگىن ق ر ءى ءى م توتەنشە جاعدايلار جونىندەگى كوميتەتىنىڭ رەسمي وكىلى رۋسلان يمانقۇلوۆ حابارلادى.
«25 -شىلدەدە 18 ساعات 05 مينۋتتا، بوستاندىق اۋدانىندا رەسپۋبليكالىق جەدەل-قۇتقارۋ وتريادىنىڭ كۇشىمەن نورۆەگيانىڭ ەكى ازاماتى تابىلدى. ولار سول كۇنى 16 ساعات 15 مينۋتتا ايۋساي شاتقالىندا اداسىپ كەتكەن بولاتىن»، - دەدى ر. يمانقۇلوۆ.
قۇتقارىلعان ازاماتتار - 1988 -جىلى 7 -اقپاندا تۋعان وريون ستەيرو مەن 1983 -جىلى 7 -مامىردا تۋعان مارتين كانگ وستۆەيت.
ولاردىڭ ءحالى قاناعاتتانارلىق جاعدايدا.
سونداي-اق، 25 -شىلدەدە رەسپۋبليكالىق جەدەل-قۇتقارۋ وتريادى المااراسان شاتقالىنان 22 جاستاعى ازاماتشانى قۇتقاردى. ونىڭ دا جاعدايى ءبىرقالىپتى، قاناعاتتانارلىق كۇيدە.
اۆتور: ايبوتا جاپپاربەرگەن
