قانات يسلام: ۇلتتىق قۇرامانىڭ باس باپكەرى مىرزاعالي ايتجانوۆ ناعىز ەڭبەكقور باپكەر
بۇل تۋرالى قانات يسلام ءوزىنىڭ فەيسبۋكتەگى جەكە پاراقشاسىندا جازدى.
«بوكستان قازاقستان ۇلتتىق قۇرامانىڭ باس باپكەرى مىرزاعالي ايتجانوۆ ناعىز ەڭبەكقور باپكەر. ءوز سالاسىنىڭ جىلىگىن شاعىپ، مايىن ىشكەن مامان. كەزىندە تالاي قارسىلاسىن نوكاۋتقا قۇلاتقان بوكسشىنىڭ بۇگىندە ۇلتتىق قۇرامانى جاتتىقتىرىپ جۇرگەنىنە قۋانىشتىمىن. جىگىتتەردىڭ جىگەرىن قايراپ، نامىسىن شىڭداپ جەڭىسكە جەتۋىنە بارىن سالىپ ءجۇر. بۇيىرتسا، بوكسشىلار ريو وليمپياداسىندا جوسپارلاعان التىندى الىپ قايتاتىنىنا سەنىمدىمىن! ۇلت بەدەلى ءۇشىن ەڭبەك ەتىپ جۇرگەن اعالارىم امان بولسىن! توگىلگەن تەردىڭ جەمىسى مىندەتتى تۇردە بولادى»، - دەپ جازادى قانات يسلام.
سونداي- اق، ول ءوزىنىڭ وليمپياداعا باراتىن بوكسشىلارعا قولۇشىن بەرىپ جاتقانىن دا ايتىپ وتكەن.
«قازىر ۇلتتىق قۇرامامەن بىرگە جاتتىعۋ جاساپ، جىگىتتەرمەن تاجىريبە الماسىپ، بىلگەنىمدى ۇيرەتىپ جاتىرمىن. بىزگە تەك جەڭىس كەرەك! ول ءۇشىن ءبارىمىز اتسالىسۋىمىز قاجەت. ارتىندا ءۇمىت ارتقان ەلى بارىن سەزىنگەن سپورتشى عانا توپتى جارىپ، التىن الادى. ريودا ەلىمىزدىڭ نامىسىن قورعايتىن بارلىق سپورتشىلارعا جەڭىس تىلەيمىن! كوك تۋىمىز جەلبىرەي بەرسىن!»، - دەپ جازادى تانىمال بوكسشى.
اۆتور: كۇنسۇلتان وتارباي
