نۇرسۇلتان نازاربايەۆ ارداگەر سۇلتان جيەنبايەۆقا مەملەكەتتىك بەيبىتشىلىك جانە پروگرەسس سىيلىعىن تاپسىردى
نۇرسۇلتان نازاربايەۆ كەزدەسۋ بارىسىندا س. جيەنبايەۆقا قوعامدىق جانە ەتنوسارالىق كەلىسىمدى ورنىقتىرۋعا، ەل حالقىنىڭ بىرلىگىن نىعايتۋعا قوسقان ايرىقشا ۇلەسى ءۇشىن مەملەكەتتىك بەيبىتشىلىك جانە پروگرەسس سىيلىعىن تابىس ەتتى.
قازاقستان پرەزيدەنتى س. جيەنبايەۆقا اسكەري ەرلىگى مەن ەلدىڭ دامۋى جولىنداعى ايانباي ەتكەن ەڭبەگى ءۇشىن العىس ايتىپ، العان ماراپاتىمەن قۇتتىقتادى.
- ءسىز وتكەن عاسىردىڭ قيىن كەزەڭدەرىنىڭ كۋاسى بولدىڭىز. ۇلى وتان سوعىسىن باستان اياعىنا دەيىن وتكەردىڭىز، ودان كەيىن قازاقستان ەكونوميكاسىن وركەندەتۋ جولىندا قىزمەت ەتتىڭىز. تاۋەلسىزدىك جىلدارىندا ەلىمىزگە باعا جەتپەس قولداۋ كورسەتتىڭىز. وتكەن ءومىرىڭىزدى ايتا وتىرىپ، جاستاردى تاربيەلەپ كەلەسىز. بۇل تۋرالى بارشامىزعا ايان، از ايتىلىپ، از جازىلعان جوق. بۇگىندە ءسىزدىڭ بيىك ازاماتتىق قاسيەتتەرىڭىز بارشا قازاقستاننىڭ قۇرمەتى مەن قوشەمەتىنە لايىق، - دەدى مەملەكەت باسشىسى.
نۇرسۇلتان نازاربايەۆ ۇلى وتان سوعىسىنىڭ ارداگەرىنە زور دەنساۋلىق پەن باقىت تىلەدى.
س. جيەنبايەۆ رەسپۋبليكانىڭ قالىپتاسۋى مەن دامۋىنداعى قازاقستان پرەزيدەنتىنىڭ جەكە ەڭبەگىنە توقتالدى جانە ءوز قىزمەتىن جوعارى باعالاعانى ءۇشىن العىس ايتتى.
