قازاقستاندىقتار ريو وليمپياداسىنا ۆيزاسىز بارۋى مۇمكىن
مۇحتار تىلەۋبەردىنىڭ ايتۋىنشا، بۇل كەلىسىم تەزىرەك كۇشىنە ەنسە، قازاقستان ازاماتتارى ون كۇننەن كەيىن الاۋى جەلبىرەيتىن ريو وليمپياداسىنا ۆيزاسىز بارۋعا مۇمكىندىك الادى.
«قازاقستان ازاماتتارى سىرتقا شىققان كەزدە ۆيزاسىز نەمەسە ۆيزانى جەڭىلدەتىپ الۋ جۇيەسىن قۇرۋ تۋرالى ەلباسىنىڭ تاپسىرماسى بار. سوندىقتان، سىرتقى ىستەر مينيسترلىگى بۇل باعىتتا تۇراقتى تۇردە جۇمىس اتقارۋدا. مىنە، برازيليا مەن قازاقستان اراسىندا كەلىسىمگە قول قويدىق. بۇل كەلىسىم بويىنشا، ەكى ەل ازاماتتارى ءبىر- بىرىنە وتىز كۇنگە دەيىن ۆيزاسىز ساپارلار شەگە الادى. وزدەرىڭىز بىلەسىزدەر، برازيليا لاتىن امەريكاسىندا ءوز دەڭگەيىندە كوتەرىلگەن مەملەكەت. سوندىقتان، ءبىز ءۇشىن بۇل وزگەرىستىڭ ماڭىزى زور. ارينە، كەلىسىمدى تولىقتىرامىز، قازىرگى كەزدە وسىنداي وزگەرىس كەرەك. وزدەرىڭىز بىلەسىزدەر، ون كۇننەن كەيىن برازيليادا وليمپيادا ويىندارى باستالادى. سوندىقتان، جاقىن ارادا وسى كەلىسىمدى كۇشىنە ەنگىزىپ، ءبىزدىڭ ازاماتتارىمىز وليمپيادا ويىندارىنا ۆيزاسىز بارادى دەپ ۇمىتتەنەمىز»، - دەدى كەلىسىمگە قول قويعاننان كەيىن م. تىلەۋبەردى.
ۆيتسە- مينيستر اتاپ وتكەندەي، بۇل كەلىسىمنىڭ قازاقستان ءۇشىن تاعى ءبىر ءتيىمدى تۇسى برازيليا ازاماتتارى كەلەسى جىلى ەكسپو كورمەسىنە ۆيزاسىز كەلە الادى.
«ونىڭ ۇستىنە وزدەرىڭىز بىلەسىزدەر، برازيليا ازاماتتارىنىڭ سانى كوپ ەل. ەكى ءجۇز ميلليوننان استام حالقى بار. سوندىقتان، كەلەسى جىلى استانادا وتەتىن ەكسپو-2017 گە قوناققا برازيليادان كوپ قوناق كەلەدى دەپ ۇمىتتەنەمىز»، - دەدى ويىن تۇيىندەگەن م. تىلەۋبەردى.
ايتا كەتەيىك، بۇگىن قول قويىلعان كەلىسىم سونداي- اق، ەكى ەلدىڭ ىنتىماقتاستىعىن دامىتۋعا، ساۋدا- ەكونوميكالىق، عىلىمي- تەحنيكالىق، مادەني- گۋمانيتارلىق، تۋريستىك جانە وزگە بايلانىستاردى نىعايتۋعا، اسىرەسە ەكى ەل ازاماتتارىنىڭ ءوزارا ساپارلارىن جەڭىلدەتۋگە باعىتتالعان.
اۆتور: كەنجەكەي توقتامۇرات قىزى
