رەسەي قۇراماسى وليمپياداعا قاتىساتىن بولدى

استانا. قازاقپارات - حالىقارالىق وليمپيادا كوميتەتى رەسەي قۇراماسىن وليمپيادا ويىندارىنا قاتىستىراتىن بولدى.

سونداي-اق ح و ك رەسەي اتلەتتەرىنىڭ 2016-جىلعى وليمپياداعا قاتىسۋى تۋرالى شەشىمدى سپورت تۇرلەرى بويىنشا حالىقارالىق فەدەراتسيا قابىلدايتىنىن اتاپ ءوتتى، دەپ جازادى ت ا س س.

سونىمەن بىرگە وسىعان دەيىن دوپينگ داۋىنا ىلىككەن رەسەي سپورتشىلارى وليمپياداعا قاتىسا المايتىنى بەلگىلى بولدى.

ايتا كەتەيىك، بۇگىن بريتانيالىق تانىمال Daily Mail باسىلىمى حالىقارالىق وليمپيادا كوميتەتى (ح و ك) بۇكىل رەسەي قۇراماسىن «مەملەكەتتىك دوپينگتىك باعدارلاماسى» ءۇشىن جازالاپ وتىرعانىن، ال ح و ك- تىڭ ۇستانىمى «دوپينگ - سپورت اتاۋلىعا جاسالعان شابۋىل» ەكەنىن العا تارتا وتىرىپ، رەسەيلىك سپورتشىلاردى وليمپيادا ويىندارىنان شەتتەتەتىنى تۋرالى جازادى. سونداي-اق، كەيبىر دەرەككوزدەر كەلتىرگەن دايەكتەرگە سۇيەنسەك، رەسەي سپورتشىلارىن تەك ريودان عانا ەمەس، 2018-جىلى وڭتۇستىك كورەيادا وتەتىن قىسقى وليمپيادا ويىندارىنان دا شەتتەتۋ ماسەلەسى قاراستىرىلىپ جاتقانى ايتىلادى.

وسىعان دەيىنگى دەرەكتەردە حابارلانعانداي، حالىقارالىق وليمپيادا كوميتەتى رەسەيلىك سپورتشىلاردىڭ ريو وليمپياداسىنا قاتىسۋ- قاتىسپاۋى تۋرالى شەشىمىن شىلدەنىڭ 24- كۇنى جاريالاۋى ءتيىس بولاتىن. بۇگىن بۇل ماسەلەگە نۇكتە قويىلۋى ءتيىس.

ەستەرىڭىزگە سالا كەتەيىك، دوپينگ داۋى قازاقستان قۇراماسىن دا اينالىپ وتكەن جوق. وسىعان دەيىن حالىقارالىق اۋىر اتلەتيكا فەدەراتسياسى (IWF) قازاقستاندىق اۋىر اتلەت يليا ءيليننىڭ بەيجىڭ مەن لوندون وليمپيادالارى كەزىندە، ال ءزۇلفيا چينشانلو، مايا مانەزا جانە سۆەتلانا پودوبەدوۆا ۇشەۋى سوڭعى وليمپيادادا دوپينگ قولداندى دەپ، جارىستاردان شەتتەتكەن بولاتىن. بۇل اتى اتالعان سپورتشىلار بيىلعى ريو وليمپياداسىنا قاتىسپايدى.