تاياۋدا وڭتۇستىك تۇرعىندارى شالعاي اۋداندارعا اۋە جولى ارقىلى قاتىناۋى مۇمكىن

استانا. قازاقپارات - و ق و اكىمىنىڭ ورىنباسارى س. تۇياقبايەۆ كانادالىق «ۆيكينگ ەير» كومپانياسىنىڭ ۇسىنعان ۇشاعىنىڭ تانىستىرىلىمىنا قاتىستى.

بۇل تۋرالى و ق و اكىمىنىڭ باسپا ءسوز قىزمەتىنەن حابارلادى.

شىمكەنتكە كەلگەن كومپانيا وكىلدەرى «Twin otter 400» ۇشاعىنىڭ 19- ورىنعا لايىقتالعانىن، سونداي-اق، اۋە كەمەسىنىڭ تەك جولاۋشىلاردى تاسىمالداپ قانا قويماي، جۇك تاسىمالىمەن دە اينالىساتىنىن جەتكىزدى. كوپ سالالى ۇشاقتىڭ سۋ بەتىنە قونىپ، ءتىپتى اسفالت توسەلمەگەن قارا جەرگە دە قونۋعا مۇمكىندىگى بار. ەگەر دە ءبىزدىڭ ەلىمىز بەن كانادا ەلىنىڭ كومپانياسى اراسىندا كەلىسسوزدەر جاقسى ناتيجە بەرسە، وسى ۇشاقتاردىڭ العاشقى باعىتى شاردارا بولماق.

ودان كەيىنگى باعىتتار ماقتارال مەن سوزاق اۋداندارى بولۋى مۇمكىن. «ۆيكينگ ەير» كومپانياسى وكىلىنىڭ ايتۋىنشا، ولار ءبىزدىڭ ەلىمىزبەن جۇمىس جاساۋدى كوپتەن بەرى جوسپارلاپ كەلگەن ەكەن. سونىمەن بىرگە، قازاقستاننىڭ ەكونوميكالىق الەۋەتى ازاماتتىق اۆياتسيا تۇرعىسىندا وتە جوعارى دەپ ەسەپتەيدى. ايتا وتەيىك، ۇشاقتىڭ قۇنى 7 ميلليون ا ق ش دوللارىن قۇرايدى.