يليا يلين: جاتتىقپاعانىما ءبىر اي بولدى، زاۋقىم جوق

استانا. قازاقپارات - وليمپيادا چەمپيونى يليا يلين جارىستان شەتتەتىلگەننەن كەيىنگى ءومىرى تۋرالى ايتىپ بەردى.

بۇل تۋرالى Vesti.kz حابارلايدى.

اعىمداعى جىلدىڭ 16 -ماۋسىمىندا اۋىر اتلەتيكا حالىقارالىق فەدەراتسياسى يليا يليننەن 2008-2012 -جىلدارى الىنعان دوپينگ- سىنامالارىنىڭ راستالعانىن حابارلاعان بولاتىن. ارتىنشا سپورتشى ريو وليمپياداسىنان شەتتەتىلدى.

باسىلىمنىڭ حابارلاۋىنشا، ءدال قازىر يليا فرانسيادا ءجۇر. ول جەرگە «تۋر دە فرانستى» كورىپ، دوپينگ سىنامالارى تۋرالى اقپاراتقا كوز جەتكىزۋ ءۇشىن كەتكەن ەكەن. مۇنىمەن قاتار، اۋىر اتلەتشى نەمەن اينالىسىپ جۇرگەنى تۋرالى ايتىپ بەردى.

«مەن دە وزدەرىڭىزدەي اداممىن. سوندىقتان دوپينگ تۋرالى جاڭالىقتى ەستىگەن كەزدە قاتتى تاڭىرقادىم. كەيىن ساباما تۇسە باستادىم. دايىندالماعانىما ءبىر اي بولدى، زاۋقىم سوقپاي ءجۇر. زالعا بارىپ ءجۇرمىن، ءبىراق جارىسقا قاتىساتىن جىگىتتەرگە قولداۋ كورسەتۋ ءۇشىن عانا.

وسىعان دەيىن بار ۋاقىتىمدى وتباسىم مەن سپورتقا ارناعان بولاتىنمىن. اراسىندا ەلدى- ەلدى ارالاپ ساياحاتتادىم. العاشىندا نوۆوسىبىردە بولدىم، كەيىن ابحازيادا. بۇدان كەيىن جەنەۆاعا ۇشىپ، قازىر فرانسيادا ءجۇرمىن»، - دەيدى ول. ال دوپينگ ماسەلەسىنە قاتىستى قولىندا بار اقپاراتتى ازىرگە جاسىرا تۇرۋدى ءجون كوردى.

 

فوتو: instagram.com/ilyailyin_official/؟ hl=ru