قازپوشتا اتاقتى اسكەري بارلاۋشى، مايدانگەر ءمورالى شامەنوۆكە ارنالعان ماركا شىعاردى
كومپانيانىڭ باسپا ءسوز قىزمەتىنىڭ حابارلاۋىنشا، پوشتالىق ماركادا سوعىس ارداگەرى، بارلاۋ وفيتسەرى، ەرجۇرەك جاۋىنگەر، سوعىستان كەيىن قىزمەتىن شىعىس گەرمانيادا جالعاستىرعان ءمورالى شامەنوۆ بەينەلەنگەن. بارلاۋ وفيتسەرى، كاپيتان شامەنوۆ بالتىق ماڭىنداعى جانە بەلورۋسسيا مايداندارىنىڭ 326 اتقىشتار ديۆيزياسىنىڭ قورعانىس جانە شابۋىلدى ۇرىستارىنىڭ قاتىسۋشىسى بولعان، ونىڭ باسشىلىعىمەن كوپتەگەن شولۋ وپەراتسيالارى مەن جاۋىنگەرلىك ىستەرى ءساتتى وتكىزىلگەن.
ۇلى وتان سوعىسى اياقتالعاننان كەيىن جۋرناليست، قوعام قايراتكەرى، اۋىلشارۋاشىلىعىنىڭ ءوندىرىسشى مامانى بولعان.
اسكەري ەرلىگى مەن ەڭبەكتەگى قىزمەتى ءۇشىن ءمورالى شامەنوۆ لەنين، قازان توڭكەرىسى، وتان سوعىسىنىڭ I جانەⅡ دارەجەلى وردەندەرىمەن، قىزىل جۇلدىز، «قۇرمەت بەلگىسى» جانە باسقا دا كوپتەگەن مەدالدارمەن ماراپاتتالعان.
پوشتالىق ماركا وفسەتتىك باسىلىمدا 2 بوياۋمەن 105 ماركادان تۇراتىن ماركالىق پاراق تۇرىندە شىعارىلعان. پوشتالىق ماركانىڭ نومينالى - 50 تەڭگە. تارالىمى 2 ميلليون دانا. سۋرەتشى - سەرگەي مارشەۆ. پوشتالىق ماركالار «قازاقستان رەسپۋبليكاسىنىڭ ۇلتتىق بانكى بانكنوتتىق فابريكاسى» رەسپۋبليكالىق مەملەكەتتىك كاسىپورنىندا باسىپ شىعارىلعان.
ەسكە سالا كەتسەك، «قازپوشتا» ا ق - پوشتالىق، قارجىلىق جانە لوگيستيكالىق قىزمەتتەردى ۇسىناتىن قازاقستان رەسپۋبليكاسىنىڭ ۇلتتىق پوشتا وپەراتورى. دۇنيەجۇزىلىك پوچتا وداعىنىڭ مۇشەسى، VISA International جانە MasterCard Worldwide حالىقارالىق تولەم جۇيەلەرىنىڭ ءپرينتسيپتى قاتىسۋشىسى. «سامۇرىق- قازىنا» ا ق كومپانيانىڭ جالعىز اكسيونەرى.
