ريو وليمپياداسىندا ەلدوس سمەتوۆتەن ەرەكشە ءۇمىت كۇتەدى
ءبىز بۇگىن سىزدەردىڭ نازارلارىڭىزعا ەل نامىسىن قورعايتىن دزيۋدوشىلارىمىزدى تانىستىرۋدى باستايمىز.
اۋەلى دزيۋدو كۇرەسى تۋرالى قىسقاشا توقتالىپ وتەيىك. بۇل كۇرەس جەكپە-جەكتىڭ الەمدەگى ەڭ تانىمال ءتۇرى جانە اينالىسۋشىلاردىڭ سانى بويىنشا كوش باستاپ تۇرعان سپورتتىڭ ءبىرى.
كەيبىر مالىمەتتەرگە سۇيەنسەك، دۇنيەجۇزى بويىنشا 28 ميلليوننان استام بالۋان كۇرەستىڭ وسى تۇرىمەن اينالىسادى ەكەن. ارينە، ەڭ كوپ دزيۋدوشى وسى كۇرەستىڭ وتانى - جاپونيادا تىركەلگەن: وندا دزيۋدوگيدى (دزيۋدومەن اينالىسۋعا ارنالعان كيىم) ۇستەرىنەن تاستامايتىن سەگىز ميلليونعا جۋىق ادامدى كەزدەستىرۋگە بولادى ەكەن.
ال و باستا، كودوكان حرامىنداعى العاشقى دزيۋدو مەكتەبىن اشقاندا وسى كۇرەستىڭ نەگىزىن قالاۋشى دزيگورو كانونىڭ نەبارى توعىز شاكىرتى بولعان ەكەن. مىنە، بۇگىنگى تاڭدا كۇرەستىڭ بۇل ءتۇرى دامىعانى سونشالىق ەڭ قىزىقتى سپورت تۇرلەرىنىڭ بىرىنە اينالعان.
قازىر ءبىزدىڭ ەلىمىزدە دە دزيۋدو ەرەكشە دامىپ كەلەدى. 2008-جىلعى بەيجىڭدە اسقات جىتكەيەۆ (100 كەلى) تۇڭعىش رەت وليمپيادا ويىندارىنىڭ كۇمىس جۇلدەگەرى اتاندى. لوندوندا ءۇمىت ارتقان دزيۋدوشىلارىمىز ءۇمىتتى اقتاي الماعان بولاتىن. ەندى ريودا كىمنىڭ باعى جانادى؟
بيىل برازيليادا وتەتىن وليمپياداعا بەس قازاقستاندىق تاتامي شەبەرى جولداما الدى. ولاردىڭ ۇشەۋى ەر، ەكەۋى ايەل. سپورتتىڭ بۇل تۇرىنەن ەرلەردەن ەلدوس سمەتوۆ، جانساي سماعۇلوۆ، ماكسيم راكوۆقا ءۇمىت ارتساق، ايەلدەردەن گالبادراح وتگونتسەگتسەگ پەن ماريام وردابايەۆاعا ءۇمىت ارتىپ وتىرمىز.
ەلدوس سمەتوۆ
تۋعان كۇنى/جىلى: 9.09.1992
تۋعان جەرى: تاراز
سالماعى: 60 كەلى
باپكەرى: ە. يمانبەكوۆ
جەتىستىكتەرى:
جاستار اراسىندا الەم چەمپيونى (2010)
جاستار اراسىندا الەم چەمپيوناتىنىڭ قولا جۇلدەگەرى (2011)
الەم كۋبوگىنىڭ يەگەرى (2011)
ازيا چەمپيوناتىنىڭ قولا جۇلدەگەرى (2013)
ەۋروپا كۋبوگىنىڭ جەڭىمپازى (2013)
جازعى ازيا ويىندارىنىڭ جەڭىمپازى (2014)
الەم چەمپيونى (2015)
ازيا چەمپيونى (2016)
گران-پري ءتۋرنيرىنىڭ ەكى دۇركىن چەمپيونى (2013, 2014). كوپتەگەن حالىقارالىق تۋرنيرلەردىڭ جەڭىمپازى جانە جۇلدەگەرى، ق ر حالىقارالىق دارەجەدەگى سپورت شەبەرى.
ەلدوستىڭ وسىعان دەيىنگى ناتيجەلەرىنە قاراپ وتىرساق، ءبىراز بيىكتەردى باعىندىرىپ تاستاعانى كورىنىپ تۇر. قازىر قورجىنىندا تەك وليمپيادا ويىندارىنىڭ جۇلدەسى عانا جوق. بيىل باعى مەن بابى قاتار شاۋىپ، جۇلدەمەن ورالسىن دەپ تىلەيىك.
اۆتور: كۇنسۇلتان وتارباي
