مەكتەپتە قازاق تىلىنە ارنالعان ساعات سانى كوبەيەدى

استانا. قازاقپارات - ۇشتىلدىلىك جۇيەسىن ەنگىزۋگە بايلانىستى مەكتەپتەردە قازاق تىلىنە بولىنەتىن ساعات سانى دا كوبەيەدى.

بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا «اقپاراتتىق- تالداۋ ورتالىعى» ا ق دەپارتامەنت ديرەكتورى ەلدوس نۇرلانوۆ ايتتى، دەپ حابارلايدى BNews.kz ءتىلشىسى.

ەلدوس نۇرلانوۆ ءسوز باسىندا ەكونوميكالىق ىنتىماقتاستىق جانە دامۋ ۇيىمىنا (و ە س ر) مۇشە ەلدەردىڭ كوپتىلدىلىك تاجىريبەسىنە توقتالدى.

«ەۋروپا ەلدەرىندە كوپ ءتىلدى ءبىلىم بەرۋگە وسىدان 20 جىل بۇرىن كوشتى. ءاربىر ەۋروپالىق وقۋشى كەم دەگەندە ەكى شەت ءتىلىن وقۋعا مۇمكىندىگى بار. ناتيجەسىندە بۇگىنگى تاڭدا ەۋروپالىقتاردىڭ 54 پايىزى كەمىندە ءبىر شەت ءتىلىن بىلەدى. 25 پايىزى ەكى ءتىلدى، 10 پايىزى ءۇش ءتىلدى جەتىك مەڭگەرگەن. ءتىل ماسەلەسى قوزعالعاندا، كوپشىلىگىمىز جاپونيانى ەسكە الامىز. جاپونيا دا كوپ ءتىلدى ءبىلىم بەرۋ ۇردىسىنەن قالىس قالماق ەمەس»، - دەيدى ە. نۇرلانوۆ.

ويتكەنى، ونىڭ ايتۋىنشا، بۇگىنگى تاڭدا جاپونيا كورشى ەلدەردەن اعىلشىن ءتىلى يندەكسى بويىنشا قالىس قالىپ وتىرعانىن ءتۇسىندى. بۇل مەملەكەت ءوزىنىڭ بولاشاعىن اعىلشىن تىلمەن بايلانىستىرىپ وتىرعاندىقتان، ءۇشىنشى سىنىپتان اعىلشىن ءتىلىن وقۋعا كىرىسكەن. ال 2020 -جىلدان كەيىن كۇنشىعىس ەلى ازيا قۇرلىعىندا اعىلشىن تىلىنەن كوش باستاۋدى ماقسات تۇتىپ وتىر.

«جاپونيادا اعىلشىن ءتىلىن 14-16 جاستان وقيدى دەگەن اقپارات ءجۇر. بۇل ەسكىرگەن مالىمەت. وسى جىلدىڭ مامىر ايىندا مەن پاريج قالاسىندا جاپونيانىڭ ۇلكەن دەلەگاتسياسىمەن كەزدەسىپ، اعىلشىن تىلىنە قاتىستى ولاردىڭ قانداي جوسپارى بارىن ءبىلدىم. جاپونيانىڭ ءبىلىم ءمينيسترىنىڭ سايتىنا كىرىپ، جوسپارىنىڭ بارىنا كوز جەتكىزدىم»، - دەيدى ول.

ماماننىڭ ايتۋىنشا، اعىلشىن ءتىلىن مەڭگەرۋ دەڭگەيى جوعارى مەملەكەتتەردىڭ ءبىرقاتار دامۋ كورسەتكىشى دە كوش ىلگەرى.

«اعىلشىن ءتىلى انا ءتىلى سانالمايتىن ەلدەردە ونىڭ دەڭگەيىن سارالايتىن زەرتتەۋ بار. اعىلشىن ءتىلى ءبىلىمىنىڭ يندەكسىنە سايكەس، وسى زەرتتەۋگە ىلىنگەن مەملەكەتتەردىڭ دەنى، ولاردىڭ باسىم كوپشىلىگى سكانديناۆ ەلدەرى، اعىلشىن ءتىلىن نەعۇرلىم جاقسى بىلسە، ەكونوميكالىق دامۋى دا سوعۇرلىم جوعارى. جاستاردىڭ اراسىنداعى جۇمىسسىزدىق دەڭگەيى سونشالىقتى تومەن، عىلىمي قىزمەتتەردەن وندىرىلەتىن تاۋارلاردىڭ ەكسپورتى دا سوعۇرلىم جوعارى. بۇل دالەلدەنگەن فاكتى»، - دەيدى اقپاراتتىق- تالداۋ ورتالىعىنىڭ وكىلى.

ونىڭ پايىمداۋىنشا، قازاقستاندا حالىق سانى كوپ بولماعاندىقتان، قوعامدا ۇشتىلدىلىك ساياساتى مەملەكەتتىك ءتىلدىڭ دارەجەسىن تومەندەتەدى دەگەن قاۋىپ بار.

«ەۋروپانىڭ كوپتەگەن ەلدەرى ءبىلىم بەرۋ ساياساتىن جۇرگىزەدى. ونى قانشالىقتى ساپالى جۇرگىزەتىنىمىز بىزگە بايلانىستى. جاڭارتىلعان وقۋ باعدارلامالارىنا سايكەس، اعىلشىن تىلىنە بولىنەتىن ساعات سانى كوبەيەدى. سونىمەن قاتار، قازاق تىلىنە بولىنەتىن ساعات سانى دا 300-دەن استام ساعاتقا كوبەيەدى. سونداي- اق، اعىلشىن ءتىلىن ءپان رەتىندە عانا وقىتىپ قويماي، شەتەلدىك تاجىريبەگە سايكەس، كەيبىر پاندەردى اعىلشىن تىلىنە كوشىرۋ جوسپارى بار.

ءبىراق، مۇندا ەكى نارسەنى ەسكەرۋ كەرەك. بىرىنشىدەن، ءبىز بۇل جوسپاردى بىرتىندەپ، دايەكتى جۇزەگە اسىرماقشىمىز. ەكىنشىدەن، جوعارى سىنىپتاردا عانا 2019 -جىلى بەلگىلى ءبىر پاندەردى، سونىڭ ىشىندە فيزيكا، حيميا، بيولوگيانى تاڭداپ وتىرمىز. مەكتەپتەردىڭ مۇمكىندىگى بولاتىن بولسا، سولاردىڭ القالى شەشىمىمەن عانا ەنگىزىلەدى. دەمەك، ءبىز بۇل ءىس- شارانى دايەكتى جۇرگىزىپ، مەملەكەتتىك تىلگە ەش زيانىن تيگىزبەۋدى كوزدەپ وتىرمىز. سايىپ كەلگەندە، بۇل تىكەلەي ورىنداۋشىلىق مادەنيەتىنە جانە تىلگە دەگەن جاناشىرلىعىمىزعا بايلانىستى بولادى»، - دەپ قورىتتى ءسوزىن ە. نۇرلانوۆ.