08:09, 21 - شىلدە 2016 | GMT +6
قازاقستان مەن ۆەنگريانىڭ ساۋدا-ەكونوميكالىق ىنتىماقتاستىعى تالقىلاندى
استانا. قازاقپارات - ق ر ۇلتتىق ەكونوميكا ءمينيسترى قۋاندىق بيشىمبايەۆ ۆەنگريانىڭ قازاقستانداعى توتەنشە جانە وكىلەتتى ەلشىسى اندراش بارانيمەن كەزدەسۋ وتكىزدى، دەپ حابارلايدى ق ر ۇلتتىق ەكونوميكا مينيسترلىگىنىڭ باسپا ءسوز قىزمەتى.
«تاراپتار قازاقستان مەن ۆەنگريانىڭ ساۋدا-ەكونوميكالىق، ينۆەستيتسيالىق ىنتىماقتاستىعىنىڭ، سونىمەن قاتار الداعى ۇكىمەتارالىق كوميسسياسىنىڭ 5-وتىرىسىن ۇيىمداستىرۋدىڭ وزەكتى ماسەلەلەرىن تالقىلادى»، دەلىنگەن حابارلامادا.
بۇدان باسقا، ەلدەر اراسىندا ودان ءارى جەمىستى ىنتىماقتاسۋ ماقساتىندا قازاق-ۆەنگر ستراتەگيالىق كەڭەسىنىڭ قۇرىلتاي وتىرىسىن جانە ۇكىمەتارالىق كوميسسيا شەڭبەرىندە ەكى ەلدىڭ بيزنەس فورۋمىن وتكىزۋ تۋرالى كەلىسىمگە قول جەتكىزدى.
