كارىم ءماسىموۆ موڭعولياداعى قازاقتارعا قولداۋ كورسەتۋدى تاپسىردى
«بايان-ولگەيدەگى قازاقتاردى قولداۋعا بايلانىستى تاپسىرمالار بەردىم»، - دەپ جازدى ك. ءماسىموۆ تۋيتتەردەگى پاراقشاسىندا.
ەسكە سالساق، وتكەن اپتادا مەملەكەت باسشىسى نۇرسۇلتان نازاربايەۆتىڭ تاپسىرماسىمەن ك. ءماسىموۆ 10- شىلدەدە سەل كوشكەن موڭعولياداعى بايان-ولگەي ايماعىنداعى (وكرۋگ) ولگەي قالاسىنا باردى. توتەنشە جاعداي ناتيجەسىندە 100 دەن استام ءۇي قيراپ، 700 ادام باسپاناسىز قالدى.
ولگەي قالاسىنداعى قازاق دياسپوراسىنىڭ وكىلدەرىمەن كەزدەسۋدە ك. ءماسىموۆ پرەزيدەنت ن. نازاربايەۆتىڭ تاپسىرماسىمەن ق ر ۇكىمەتى سەل كوشكىنىنەن زارداپ شەككەن وتباسىلارعا قارجىلاي كومەك كورسەتەتىنىن مالىمدەگەن بولاتىن.
موڭعولياعا ساپارلارىنىڭ جانە قالا باسشىلىعىمەن كەزدەسۋلەردىڭ قورىتىندىسى بويىنشا قازاقستان پرەمەر-ءمينيسترى قازاقستاندىق مەملەكەتتىك ورگاندارعا ءبىرقاتار تاپسىرمالار بەردى. اتاپ ايتقاندا، مادەنيەت جانە سپورت مينيسترلىگىنە قازاقستان - موڭعوليا گۋمانيتارلىق قورىن قۇرۋ تۋرالى ماسەلەنى قاراۋ، سونداي-اق «التاي - ءبىزدىڭ ورتاق ءۇيىمىز» ەكونوميكالىق جانە مادەني-گۋمانيتارلىق جوباسىن قۇرۋ تۋرالى ۇسىنىستاردى پىسىقتاۋ تاپسىرىلدى.
بۇدان وزگە، ك. ءماسىموۆ بايان- ولگەيدەگى ولكەتانۋ مۇراجاي مەن مۋزىكالىق-دراما تەاترىنىڭ ساحناسىن جوندەۋگە قارجىلاي كومەك كورسەتۋ ماسەلەسىن زەرتتەۋدى تاپسىردى.
ينۆەستيتسيالار جانە دامۋ مينيسترلىگىنە بايان-ولگەي-الماتى، بايان-ولگەي-وسكەمەن باعىتتارى بويىنشا اۋە قاتىناسىن اشۋ تۋرالى ماسەلەنى پىسىقتاۋ تاپسىرىلدى.
اۋىل شارۋاشىلىعى مينيسترلىگىنە - موڭعوليادا سەمەي ەت كومبيناتىنا ارناپ ەت ساتىپ الۋ، سونداي-اق مال شارۋاشىلىعى كلاستەرىن قۇرۋ مۇمكىندىگىن قاراۋ تاپسىرىلدى.
سىرتقى ىستەر مينيسترلىگىنە بايان-ولگەيدە كونسۋلدىق قىزمەت اشۋ جانە وعان قوسا ۇلانباتىر قالاسىندا قازاقستان ەلشىلىگىنىڭ عيماراتىن سالۋ تاپسىرىلدى.
پرەمەر-مينيستر سونداي-اق ق ر ءبىلىم جانە عىلىم مينيسترلىگىنە موڭعوليادا تۇرىپ جاتقان ەتنيكالىق قازاقتاردىڭ قازاقستان ج و و- دارىندا وقۋىنا كۆوتالاردى ۇلعايتۋدى تاپسىردى.
