الماتىنى تىك تۇرعىزعان قىلمىسكەر سۋديا مەن پروكۋرورلاردان كەك الۋدى كوزدەگەن - ق ر ءى ءى م باسشىسى

استانا. قازاقپارات - 18- شىلدە كۇنى الماتى قالاسىندا اتىس باستاعان رۋسلان كۇلىكبايەۆ سۋديا مەن پروكۋرورلاردى ولتىرۋگە ارەكەتتەنگەن.

بۇل تۋرالى بۇگىن ۇكىمەت وتىرىسىندا ق ر ىشكى ىستەر ءمينيسترى قالمۇحانبەت قاسىموۆ ءمالىم ەتتى.

«قولعا تۇسكەن كۇلىكبايەۆ رۋسلان بۇرىن ەكى رەت سوتتالعان، ءارتۇرلى تۇزەتۋ مەكەمەلەرىندە جازاسىن وتەگەن. ول ۇرلاعان قارۋدى وقيعا ورنىنان تاپتىق، وكىنىشكە قاراي، بەس ادام قازا تاپتى. ال مەن وسى كەڭەسكە كەلە جاتقاندا، ساعات 14.00 شاماسىندا تاعى ءبىر پوليتسەي العان جاراقاتىنان كوز جۇمدى. ال ۇستالعان قىلمىسكەرگە وپەراتسيا جاسالدى. ول ادۆوكاتتىڭ كوزىنشە قۇقىق قورعاۋشىلاردان، ونىڭ ىشىندە سۋديا مەن پروكۋراتۋرا قىزمەتكەرلەرىنەن، ارنايى قىزمەت پەن پوليتسيادان كەك العىسى كەلگەنىن ءمالىم ەتتى. وسىلايشا، كەشە ول ءبىرىنشى كەزەكتە سۋديالار مەن پروكۋراتۋرا قىزمەتكەرلەرىن ولتىرگىسى كەلگەن»، - دەپ ءمالىم ەتتى قالمۇحانبەت قاسىموۆ.

اۆتور: كەنجەكەي توقتامۇرات قىزى