ە. قارين: تەرروريزممەن كۇرەسۋدىڭ باستى العىشارتى - جالپى قىلمىسپەن كۇرەسۋ

استانا. قازاقپارات - 18 -شىلدە كۇنى الماتى قالاسىندا اۋداندىق ىشكى ىستەر بولىمىنەن باستاپ، ۇلتتىق قاۋىپسىزدىك كوميتەتى دەپارتامەنتىنىڭ كەڭسەسىنە دەيىن، جولدا بىرنەشە بەيبىت تۇرعىنعا شابۋىل جاساپ وتكەن جانە بەس ادامنىڭ ءومىرىن قيعان رۋسلان كۇلەبايەۆتىڭ بۇرىن سوتتالعانى بەلگىلى.

جانە تەررورلىق ارەكەتىنىڭ الدىندا، ناقتىراق ايتساق، 18 -شىلدەگە قاراعان ءتۇنى الماتىدا ءبىر ايەلدى ولتىرگەن.

قازاقستان ستراتەگيالىق زەرتتەۋلەر ينستيتۋتىنىڭ ديرەكتورى، ساراپشى ەرلان قارين تەرروريزممەن كۇرەسۋدىڭ العى شارتى جالپى قىلمىسپەن كۇرەسۋ دەيدى.

«مەنىڭ كوزقاراسىم، مەنىڭ جەكە پىكىرىم تەرروريزممەن كۇرەسۋدىڭ باستى العىشارتى - جالپى قىلمىسپەن كۇرەسۋ. زەرتتەۋىمنىڭ ناتيجەسىندە بايقاعانىم وسى. تەرروريزممەن، ەكسترەميزممەن باسقا دا وسىنداي قۇبىلىستارمەن ءتيىمدى كۇرەسۋدىڭ ەڭ باستى العىشارتى - جالپى قىلمىسپەن جۇيەلى تۇردە كۇرەسۋ. سەبەبى، كوپتەگەن قىلمىستىق، تەرروريستىك، راديكالدى توپتار، قازاقستاندا بۇرىن- سوڭدى ارەكەت ەتكەن كوپتەگەن توپتار قۇقىقتىق ورگانداردىڭ نازارىنا كەزدەيسوق تۇسكەن بولاتىن. ياعني، باسقا ءبىر قىلمىستىق ارەكەت جاساعان كەزدە كوزگە تۇسكەن. سوندىقتان دا، مەنىڭ ايتارىم، تەروريزممەن كۇرەسۋدىڭ ەڭ باستى العى شارتى - جالپى قىلمىسپەن كۇرەسۋ. ەگەر دە ءبىز جالپى قىلمىسقا تويتارىس بەرىپ وتىرساق، تەرروريزمدى السىرەتەتىن ەدى»، - دەيدى ە. قارين.

اۆتور: كەنجەكەي توقتامۇرات قىزى