الماتىدا لاڭكەستىڭ بەسىنشى قۇربانى شەكارا قىزمەتىنىڭ اسكەري قىزمەتشىسى بولدى - ق ر ىشكى ىستەر ءمينيسترى

الماتى. قازاقپارات - الماتىدا پوليتسيا قىزمەتكەرلەرىنە جاسالعان شابۋىل كەزىندە قازاقستان رەسپۋبليكاسى ۇلتتىق قاۋىپسىزدىك كوميتەتى (ق ر ۇ ق ك) شەكارا قىزمەتىنىڭ اسكەري قىزمەتشىسى، اعا لەيتەنانت قازا تاپتى.

بۇل تۋرالى الماتىدا وتكەن باسپا ءسوز بريفينگى بارىسىندا ق ر ىشكى ىستەر ءمينيسترى، پوليتسيا گەنەرال- لەيتەنانتى قالمۇحانبەت قاسىموۆ ءمالىم ەتتى.

ءمينيستردىڭ ايتۋىنشا، قىلمىسكەر ونىڭ اۆتوكولىگىن يەمدەنبەك بولعان.

«المالى اۋداندىق ىشكى ىستەر باسقارماسىنان شىعىپ، ۇ ق ك دەپارتامەنتىنە جەتكەن سوڭ، قىلمىسكەر جول جيەگىندەگى پوليتسيا اۆتوماشيناسىن كورەدى. سول ارادا ماشينادان شىعادى دا، وندا وتىرعان پوليتسيا قىزمەتكەرلەرىنە وق جاۋدىرادى. سونىڭ سالدارىنان ءبىر پوليتسيا قىزمەتكەرى اۋىر جاراقات الىپ، ەكىنشىسى وقيعا ورنىندا قازا تاپتى. وسى ساتتە ۇ ق ك دەپارتامەنتىنىڭ كەزەكشىسى قىلمىسكەرگە وق اتا باستايدى. اتىس بارىسىندا قىلمىسكەردى الىپ كەلگەن جۇرگىزۋشى وقيعا ورنىنان قاشىپ قۇتىلعان. ال قىلمىسكەر ءارى قاراي جۇگىرىپ، ىشىندە ق ر ۇ ق ك شەكارا قىزمەتىنىڭ اسكەري قىزمەتشىسى، اعا لەيتەنانتتى كورىپ، ونىڭ ماشيناسىن تارتىپ الۋعا ارەكەت جاسايدى. مۇنىسىنان تۇك شىقپاعان سوڭ، شەكارا قىزمەتكەرىنە قارسى وق اتىپ، ونى سول جەردە ءولىمشى ەتىپ جارالايدى. وسى ساتتە سول جەردەن ءوتىپ بارا جاتقان ءبىر ازاماتتىق تۇلعانى دا جاراقاتتايدى. العان جاراقاتتان قالا تۇرعىنى دا كوز جۇمدى»، - دەدى ق. قاسىموۆ.

وسىلايشا، قازىرگى رەسمي مالىمەت بويىنشا، قاندى وقيعا سالدارىنان 3 پوليتسيا قىزمەتكەرى، 1 ازاماتتىق تۇلعا، 1 شەكارا قىزمەتكەرى قازا تاۋىپ، 6 پوليتسيا قىزمەتكەرى مەن 3 ازاماتتىق تۇلعا جاراقات الدى.

اۆتور: ايبوتا جاپپاربەرگەن