بەيجىڭ وليمپياداسىندا جەڭىمپاز بولعان ەكى اۋىر اتلەتىمىز مەدالىن قايتارىپ بەرەدى

استانا. قازاقپارات - بەيجىڭ وليمپياداسى كەزىندە الىنعان سىنامالارىنان دوپينگ ءىزى تابىلعان التى قازاقستاندىق سپورتشىنىڭ تورتەۋى - اۋىر اتلەت.

بۇل تۋرالى قازاقستان اۋىر اتلەتيكا فەدەراتسياسى حابارلادى.

وسى مالىمەتكە سۇيەنسەك، ءتورت اتلەتتىڭ ەكەۋى - بەيجىڭ وليمپياداسىندا كۇمىس مەدال العان يرينا نەكراسوۆا (63 كەلى) جانە قولا جۇلدەگەر ماريا گرابوۆەتسكايا. ءۇشىنشىسى 85 كەلىدە ءتورتىنشى ورىن العان ۆلاديمير سەدوۆ بولعان. ءتورتىنشى اۋىر اتلەتتىڭ ەسىمى - يليا يلين. ەندى الداعى ۋاقىتتا حالىقارالىق وليمپيادا كوميتەتى ب سىناماسىن تەكسەرەدى. ەگەر بۇل كەزدە سىناما وڭ ناتيجە بەرسە ولاردىڭ ناتيجەسى جويىلادى. ياعني، بەيجىڭ وليمپياداسىنان جەڭىپ العان ەكى اۋىر اتلەتىمىز مەدالىن قايتارىپ بەرەدى.

ەستەرىڭىزگە سال كەتەيىك، بەيجىڭ وليمپياداسىندا قازاق سپورتشىلارى 2 التىن، 4 كۇمىس، 7 قولا مەدال جەڭىپ العان بولاتىن. ولار:

التىن: باقىت سارسەكبايەۆ (بوكس، 69 كەلى)، يليا يلين (اۋىر اتلەتيكا، 94 كەلى)؛ كۇمىس: اسقات جىتكەيەۆ (دزيۋدو، 100 كەلى)، تايمۋراز تيگيەۆ (ەركىن كۇرەس، 96 كەلى)، يرينا نەكراسوۆا (اۋىر اتلەتيكا، 63 كەلى)، اننا ۆاجەنينا (اۋىر اتلەتيكا، 75 كەلى)؛

قولا: ەركەبۇلان شىناليەۆ (بوكس، 81 كەلى)، نۇرباقىت تەڭىزبايەۆ (گرەك-ريم كۇرەسى، 60 كەلى)، اسەت مامبەتوۆ (گرەك-ريم كۇرەسى، 96 كەلى)، ارمان شىلمانوۆ (تاەكۆوندو، 80 كەلى)، ماريد مۋتاليموۆ (ەركىن كۇرەس، 120 كەلى)، ەلەنا شالىگينا (ايەلدەر كۇرەس، 63 كەلى)، ماريا گرابوۆەتسكايا (اۋىر اتلەتيكا، +75 كەلى).

اۆتور: كۇنسۇلتان وتارباي