12:12, 15 - شىلدە 2016 | GMT +5
ەلباسى نيسساداعى تەراكتىگە بايلانىستى فرانسيا پرەزيدەنتىنە كوڭىل ايتتى
استانا. قازاقپارات - مەملەكەت باسشىسى نۇرسۇلتان نازاربايەۆ فرانسيا پرەزيدەنتى فرانسۋا وللاندقا نيسسا قالاسىندا بولعان تەررورلىق اكتىگە بايلانىستى كوڭىل ايتۋ جەدەلحاتىن جولدادى.
بۇل تۋرالى اقوردانىڭ باسپا ءسوز قىزمەتى حابارلادى.
جەدەلحاتتا قازاقستان پرەزيدەنتى 14 - شىلدەدە نيتستسا قالاسىندا بولعان تەررورلىق اكت سالدارىنان كوپتەگەن جازىقسىز ادامنىڭ قازا بولعانى جانە زارداپ شەككەنى تۋرالى حاباردى زور كۇيزەلىسپەن قابىلداعانى اتاپ وتىلگەن.
«قازاقستان تەرروريزمنىڭ كەز كەلگەن ءتۇرىن قاتاڭ ايىپتايدى، قانداي ماقساتتا بولسا دا جازىقسىز قان توگۋدى اقتاۋعا بولمايدى دەپ سانايدى»، - دەلىنگەن جەدەلحاتتا.
نۇرسۇلتان نازاربايەۆ قايعىعا ورتاقتاسا وتىرىپ، بارشا قازاقستاندىقتاردىڭ جانە جەكە ءوزىنىڭ اتىنان ف. وللاندقا، قازا بولعانداردىڭ وتباسىلارىنا جانە جاقىندارىنا، سونداي- اق فرانسۋز حالقىنا كوڭىل ايتتى.
ەلباسى زارداپ شەككەندەردىڭ تەزىرەك ساۋىعىپ كەتۋىنە تىلەكتەستىك ءبىلدىردى.
