س. كۋلاگين ەلباسىنا ءوڭىردىڭ نەگىزگى الەۋمەتتىك-ەكونوميكالىق كورسەتكىشتەرى تۋرالى باياندادى

استانا. قازاقپارات - ەلباسى نۇرسۇلتان نازاربايەۆ اقمولا وبلىسىنىڭ اكىمى سەرگەي كۋلاگيندى قابىلدادى.

بۇل تۋرالى اقوردانىڭ باسپا ءسوز قىزمەتىنەن حابارلادى.

كەزدەسۋ بارىسىندا س. كۋلاگين مەملەكەت باسشىسىنا ءوڭىردىڭ نەگىزگى الەۋمەتتىك-ەكونوميكالىق كورسەتكىشتەرى، مەملەكەتتىك باعدارلامالاردىڭ جۇزەگە اسىرىلۋ بارىسى، سونداي-اق الداعى كەزەڭگە ارنالعان جوسپارلارى تۋرالى باياندادى.

نۇرسۇلتان نازاربايەۆ ءوندىرىس كولەمىن ۇلعايتۋ جانە جاڭا جۇمىس ورىندارىن اشۋ ماقساتىمەن «نۇرلى جول» باعدارلاماسى اياسىندا شاعىن جانە ورتا بيزنەستى قولداۋ جۇمىستارىن جالعاستىرۋ قاجەتتىگىنە نازار اۋداردى. قازاقستان پرەزيدەنتى جىلۋ بەرۋ ماۋسىمىنا ۋاقىتىلى ءارى ساپالى دايىندالۋدىڭ ماڭىزدىلىعىن دا اتاپ ءوتتى.

اقمولا وبلىسىنىڭ اكىمى بيىلعى ءبىرىنشى جارتىجىلدىقتىڭ قورىتىندىسى بويىنشا ناقتى سەكتور سالالارىندا ءوسىم كورسەتكىشى قامتاماسىز ەتىلگەنىن ايتتى. ايتالىق، ونەركاسىپ سالاسىندا ءوندىرىستىڭ ناقتى كولەم يندەكسى %106,5 كە جەتىپ، رەسپۋبليكا بويىنشا كوشباسشى كورسەتكىشكە اينالدى.

س. كۋلاگيننىڭ ايتۋىنشا، يندۋستريالاندىرۋ كارتاسى اياسىندا جۇزەگە اسىرىلعان 62 جوبا 6 مىڭنان استام جۇمىس ورنىن اشۋعا مۇمكىندىك بەرگەن. جىل اياعىنا دەيىن تاعى 20 جاڭا جوبانى ىسكە قوسۋ جوسپارلانعان. اۋىل شارۋاشىلىعىندا مال باسى مەن قۇستىڭ ءوسىمى قامتاماسىز ەتىلىپ، مال شارۋاشىلىعى ونىمدەرىنىڭ ءوندىرىسى ۇلعايدى. وڭىردەگى اۋىل شارۋاشىلىعى داقىلدارىنىڭ ەگىس القابى 4,2 ميلليون گەكتار بولسا، سونىڭ 3,8 ميلليون گەكتارىنا استىق ەگىلگەن.

قازاقستان پرەزيدەنتىنە استانانىڭ اينالاسىندا «ازىق-تۇلىك بەلدەۋىن» دامىتۋ اياسىندا جۇرگىزىلىپ جاتقان جۇمىستار مەن ىسكە قوسۋ جوسپارلانىپ وتىرعان ءبىرقاتار جاڭا جوبالار تۋرالى دا باياندالدى.

مەملەكەت باسشىسى كەزدەسۋ قورىتىندىسى بويىنشا ءبىرقاتار ناقتى تاپسىرما بەردى.