بايان ولگەي حالقى كارىم ماسىموۆكە اقبوز ات مىنگىزىپ، شاپان جاپتى - فوتو
ەستەرىڭىزگە سالساق، ق ر پرەمەر-ءمينيسترى 15 -شىلدە كۇنى ۇلان-باتىر قالاسىندا وتەتىن XI اسەم سامميتىنە قاتىسۋ ءۇشىن موڭعولياعا بارعان بولاتىن. مۇندا ۇكىمەت باسشىسى سەلدەن زارداپ شەككەن تۇرعىندارعا قازاقستان قارجىلاي كومەك بەرەتىنىن ايتتى.
وسى وڭىردە ءىس- ساپارمەن جۇرگەن جۋرناليست مارفۋعا شاپيان ءوزىنىڭ فەيسبۋكتەگى جەكە پاراقشاسىندا ۇكىمەت باسشىسىنىڭ كەزدەسۋىنەن سۋرەتتەر جاريالاعان.
«جاڭا عانا ءبىز توقتاعان «باي ولكە» قوناق ۇيىنىڭ الدىنداعى الاڭدا قازاقستاننان كەلگەن دەلەگاتتار مەن جەرگىلىكتى قازاق حالقىنىڭ كەزدەسۋى ءوتتى. ...حالىق شىنى كەرەك، كەشەلى- بەرى ۇكىمەت باسشىنىڭ كەلۋىن كادىمگىدەي كۇتتى. ونى تاڭ اتپاستان الاڭعا جينالىپ العان حالىقتىڭ قاراسىنىڭ كوپتىگىنەن بايقاۋعا بولادى. ارينە، ولاي بولاتىن ءجونى بار. ۇكىمەت باسشىسى 25 جىلدا ءبىرىنشى رەت بۇل جاققا ات باسىن بۇرىپ تۇر ەكەن. ولگەيلىك بيلىك تاراپىنان بالاباقشا، اۋرۋحانا سالۋ، قازاقستانعا كوشىپ بارعان ورالمانداردىڭ زەينەتاقىسىن رەتتەۋ، اۋە جولىن قايتا قالپىنا كەلتىرۋ ماسەلەلەرى قوزعالدى.
ال ءبىز جاق (قازاقستان تاراپى - رەد. ) وسى ءبىر-ەكى كۇندە اپاتتان زارداپ شەككەندەرگە بەرىلەتىن قارجىنى اۋداراتىنىن جانە جاستارعا ۋنيۆەرسيتەتكە گرانت بولەتىنىن ايتتى. ەندى مەملەكەت بيۋدجەتىنەن قانشالىق قارجى بەرىلەتىنىن بىلمەيمىز عوي، ءبىراق حالىق وسىنداي كوڭىلى جارىم تۇستا قازاقستاننىڭ نازار اۋدارىپ، ءبىرىنشى بوپ كومەك قولىن سوزىپ جاتقانىنا، ۇكىمەت باسشىسىنىڭ كەلگەنىنە كادىمگىدەي قۋانىپ، ءبىر سەرپىلىپ قالعان سياقتى...» - دەيدى جۋرناليست.
