شىمكەنت تۇرعىنى قادىر تۇنىندە پەرىشتەلەردى ءوز كوزىمەن كورگەنىن ايتتى

استانا. قازاقپارات - مۇسىلماندىق بەس پارىزدىڭ ءبىرى -  ورازا تۇتقاندار جىلدان- جىلعا كوبەيىپ كەلە جاتىر. سولاردىڭ ءبىرى -  شىمكەنتتىك نۇرعوجا سىزدىقوۆ دەپ جازادى زامانا.

جازدىڭ شىجىعان ىستىعىندا ادامداردى تاماقتان بۇرىن ءشول قينايتىنى بەلگىلى. دەي تۇرعانمەن سونداي قيىندىققا ءتوزىپ جۇرگەندەر دە از ەمەس. (سۋرەتتە) . نۇرعوجا سىزدىقوۆتىڭ ۇزبەي ورازا تۇتىپ كەلە جاتقانىنا بيىل 30  جىل بولىپتى.

بۇل جونىندە ونىڭ ءوزى بىلاي دەيدى:

- مەن 1980-جىلدان بەرى بەس ۋاقىت نامازدى قازا قىلعان ەمەسپىن. سول جىلى قازىرگى تاراز قالاسىندا اتاعى كوپكە تانىمال عۇلاما شەيح ءزۇلىن دەگەن كىسىنىڭ ءبىر اۋىز سوزىنە بولا نامازعا جىعىلدىم. ءسوز اراسىندا ول كىسى مەنەن ناماز وقيسىڭ با دەپ سۇرادى. «جوق» دەپ ەدىم: «ە، وندا سەن دە مال ەكەنسىڭ عوي. ودان قاي جەرىڭ ارتىق؟ » - دەگەندە نە دەپ جاۋاپ بەرەرىمدى بىلمەي، كوپ ۇزاماي ءدىن جولىنا ءتۇستىم.

ورازا تۇتقانىما بيىل 30  جىل بولدى. بۇرىن شىمكەنتتەگى قورعاسىن زاۋىتىنداعى بالقىتۋ سەحىندا جۇمىس ىستەگەنمىن. ول جەردە ورازا تۇتۋ مۇمكىن بولمايتىندىقتان دەمالىس الاتىنمىن. قازىر ەركىم وزىمدە.

مەن دىنگە عاشىق بولدىم. وبلىس كولەمىندەگى بارلىق اۋليەلەردى زيارات ەتتىم. 1974 - 1984-جىلدارى سامارقان قالاسىنا بارىپ، ول جەردەگى ءامىر تەمىر، بيبىحانىم، جالاڭتوس باتىرعا زيارات ەتىپ، ۇلىقبەك وبسەرۆاتورياسىندا بولدىم. 1993 - 1999-جىلدارى اقمولا وبلىسىنداعى تىلەكەي، سەپە ەلدى مەكەندەرىنە ورازا ايىندا جۇرتتى بەس ۋاقىت نامازعا جانە تاراۋيح نامازعا ۇيرەتىپ دىنگە قىزمەت ەتتىم.

قادىر ءتۇنى ەڭ ءبىر قاسيەتتى تۇندەردىڭ ءبىرى سانالادى. ول ءتۇنى تازا ۇيگە كەلگەن پەرىشتەنى تازا ادام عانا كورەدى دەگەن ءسوز بار. وسىدان ون جىل بۇرىن بەس ادام بولىپ بىزدەر دە قادىر ءتۇنىن كۇتتىك. قاسىمداعىلار شارشاعانىن ايتىپ ۇيىقتاپ قالدى. مەن وقيتىن نامازىمدى وقىپ، دۇعامدى ايتىپ وتىرا بەردىم. ءبىر ۋاقىتتا كوزىم ءىلىنىپ كەتىپتى. بىرەۋ قولتىعىمنىڭ استىنان قىسىپ جىبەردى. تۋرا ادامنىڭ قىسقانى سەكىلدى. «بيسسميللا» دەپ كوزىمدى اشىپ قالدىم. بولمەنىڭ جارىعى ءوشىرۋلى ەدى. سوندا دا كەتىپ بارا جاتقان ءۇش ادامنىڭ سۇلباسىن كوردىم. جارىقتى جاقسام، ساعات تۇنگى ءۇش جارىم ەكەن. دالا تىپ- تىنىش، جەل جوق. اسپان اشىق، توڭىرەك اپپاق، جارىق بولىپ تۇر. قۋانعانىمنان تاڭ اتقانشا ۇيىقتامادىم. بۇل مەنى دەمەپ جۇرگەن پەرىشتەلەر ەكەنىن ءتۇسىندىم. سودان بەرى ءوزىمدى باقىتتى سەزىنەمىن، - دەيدى نۇرعوجا سىزدىقوۆ.