ريو وليمپياداسىنىڭ ءۇمىتى: بيىل تىناليەۆ تۋىمىزدى جەلبىرەتە الا ما؟

استانا. قازاقپارات - برازيليانىڭ ريو- دە- جانەيرو قالاسىندا وتەتىن جازعى وليمپيادا ويىندارىنىڭ باستالۋىنا ساناۋلى عانا كۇندەر قالدى.

ەندى 22 كۇننەن كەيىن ءدۇبىرلى دودانىڭ الاۋى تۇتانادى. بۇگىن وليمپيادا ويىندارىندا گرەك- ريم كۇرەسىنەن ەل نامىسىن قورعايتىن ءۇشىنشى بالۋانىمىز نۇرماحان تىناليەۆ باۋىرىمىزدى تانىستىرىپ وتىرمىز.

وسىعان دەيىن المات كەبىسبايەۆ پەن دوسجان قورتىقوۆ جايىندا ايتىپ وتكەن بولاتىنبىز.

نۇرماحان تىناليەۆ

تۋعان كۇنى/جىلى: 10.01.1988

تۋعان جەرى: جامبىل وبلىسى. دالاقاينار اۋىلى

سالماعى: 130

باپكەرى: گ. سۋرسۋميا

جەتىستىكتەرى:

جاسوسپىرىمدەر اراسىندا ازيا چەمپيونى (2007)؛

يۆان پوددۋبنىي اتىنداعى گران-پري تۋرنيرىنىڭ قولا جۇلدەگەرى (2010)؛

الەم چەمپيوناتىنىڭ قولا جۇلدەگەرى (2010)؛

جازعى ازيا ويىندارىنىڭ جەڭىمپازى (2010)؛

الەم چەمپيوناتىنىڭ قولا جۇلدەگەرى (2011)؛

«ۆەحبە ەمرە» گولدەن گران- پري ءتۋرنيرىنىڭ جەڭىمپازى (2012)؛

ازيا چەمپيونى (2013)؛

الەم چەمپيوناتىنىڭ قولا جۇلدەگەرى (2013)؛

ۋنيۆەرسيادا ويىندارىنىڭ قولا جۇلدەگەرى (2013)؛

ق ر پرەزيدەنتى كۋبوگىنىڭ جەڭىمپازى (2013)؛

جازعى ازيا ويىندارىنىڭ جەڭىمپازى (2014)؛

ازيا چەمپيونى (2015)

حالىقارالىق دارەجەدەگى سپورت شەبەرى

نۇرماحان باۋىرىمىز كۇرەس مەكتەبىنىڭ تابالدىرىعىن اكەسى اناربەكتىڭ ۇيىتقى بولۋىمەن 14 جاسىندا اتتاعان. 16 جاسىندا قازاقستان چەمپيونى اتانعان. كەيىن جاپونيادا وتكەن جاستار اراسىنداعى ازيا چەمپيوناتىندا قولا جۇلدەگە يە بولدى. ال 2007 -جىلى 19 جاسىندا بالۋان جىگىت فيليپپيندە وتكەن ازيا چەمپيوناتىندا التىن جۇلدە العاننان كەيىن جەڭىستى جولدارى جالعاسا باستادى. ونى جوعارىداعى مالىمەتتەردەن وزدەرىڭىز كورىپ وتىرسىزدار. الەم بىرىنشىلىگىنىڭ ءۇش مارتە قولا مەدالىن قانجىعاسىنا بايلادى.

وسىدان ءتورت جىل بۇرىن لوندون وليمپياداسىندا قازاق ەلى نۇرماحاننان ەرەكشە ءۇمىت كۇتتى. كەمىندە وليمپيادا ويىندارىنىڭ قولا مەدالىن الىپ ورالادى دەگەن سەنىمدە بولدى. مەملەكەت باسشىسى نۇرسۇلتان نازاربايەۆ قولىنا كوك بايراعىمىزدى سەنىپ تاپسىردى. باۋىر ەتى بالاسىنىڭ لوندوندا ءانۇرانىمىزدى اسقاقتاتا شىرقاتادى دەگەن سەنىممەن اناسى دا زور سەنىممەن ىلەسە باردى. وكىنىشكە قاراي، جوسپار دا، ءۇمىت تە اقتالمادى...

لوندوندا العاشقى جارىس جولىن 1/8 فينالدان باستاعان باۋىرىمىز شۆەتسيالىق ەۋرەن يوحاننان جەڭىلىپ قالدى. اناسىنىڭ كوز جاسى كول بولسا، جانكۇيەرلەرىنىڭ ءۇنجىرعاسى ءتۇسىپ كەتتى. ءوزى دە بىردەن جەڭىلەمىن دەپ ويلاعان جوق. وسى جەڭىلىستەن كەيىن سپورتشىنىڭ تاۋى دا، تاسى دا شاعىلدى. سىرتىنان سىن ايتىپ، ۇركە قارايتىندار كوبەيدى. الايدا، نۇرماحان لوندوننان كەيىن شامالى ۋاقىت دەمالىپ الدى دا، جاتتىعۋعا قايتا كىرىستى. «لوندوندا كەتكەن ەسەنى ريودا الامىن» دەپ وزىنە سەرت بەردى...

مىنە، انە- مىنە دەگەنشە ءتورت جىل ءوتىپ، برازيليادا وتەتىن كەزەكتى ويىنداردىڭ دا ۋاقىتى كەلىپ جەتتى. ءقازىر نۇرماحاننىڭ ناعىز تولىسىپ، پىسكەن شاعى. بۇيىرتسا الداعى وليمپيادادا قازاقستان قورجىنىنا ءبىر مەدال سىيلايدى دەگەن ۇمىتتەمىز. بيىل ساتتىلىك جولداس بولسىن دەپ تىلەيىك...

اۆتور: كۇنسۇلتان وتارباي