قازاق قىزى وتباسىلى ازاماتقا توقال بولۋدىڭ «جاقسى جاقتارىن» ءتىزىپ ايتىپ بەردى
بويجەتكەننىڭ ءوزى قاتار جىگىتتەرگە تەك جاڭا بوي تۇزەپ، قىز بولىپ بويجەتكەندە عانا كوڭىلى اۋعان. ەسەيە كەلە جاس جىگىتتەردىڭ قالتاسىنىڭ تايازدىعىن ءتۇسىنىپ، ولاردان بويىن مۇلدە اۋلاق ۇستاي باستاعان. ەسەسىنە وتباسىلى بولسا دا، قالتالى ازاماتتارعا قۇرىق سالۋدى ءجون كورگەن.
«بىردە قۇربىممەن كەزدەسىپ وتىرىپ، قالتالى ازاماتپەن تانىستىم. جاسى ۇلكەن بولعانىمەن، ءازىلقوي ەكەن. ءجۇزى دە ءوڭدى. اڭگىمەمىز جاراسىپ، كەزدەسە باستادىق. ول استانادان جۇمىس بارىسىمەن الماتىعا كەلگەن ەكەن. كەيىن ونىڭ وتباسىلى ەكەنىن ءبىلدىم. ول ماعان عاشىق ەكەنىن ايتا باستادى»، - دەيدى بويجەتكەن.
قالتالى ازامات وسىلايشا ەكى قالادا ەكى ايەلمەن كەزدەسىپ جۇرگەن. الايدا، كوڭىلدەسىنە ۋاقىت وتە كەلە باۋىر باسىپ قالعان توقالى ونى وتباسىنان اجىراتۋعا بەل بايلايدى. ايەلىنە حابارلاپ، بولعان جايتتى جايىپ سالادى. ءبىراق مۇنداي جانجالدان سوڭ كوڭىلدەسى توقالىنان بويىن اۋلاق ۇستاي باستاعان. ءبىراز ۋاقىت وتكەن سوڭ كەشىرىم سۇراپ قايتا كەلگەن. ءبىراق وتباسىمەن اجىراسۋ تۋرالى بۇدان كەيىن اڭگىمە قوزعالماعان.
«ارينە، ول مەنىڭ بارلىق جاعدايىمدى جاساپ بەرەدى. كيىمىمنەن باستاپ، تۇراتىن ۇيىمە دەيىن كومەكتەسەدى. سونىڭ ارقاسىندا ءبىر بولمەلى پاتەرىمدى جاڭا پاتەرگە اۋىستىرىپ، كولىك الدىم. كوپتەگەن سىيلىقتار الىپ تۇرام»، - دەيدى قىز.
ول كۇيەۋىنىڭ قاس-قاباعىنا قاراپ وتىراتىن قىزدارعا قاراعاندا توقال بولىپ شالقىپ ءومىر سۇرگەننىڭ الدەقايدا جاقسى ەكەنىن ايتادى. ونىڭ ۇستىنە توقال بولساڭ، وزگە دە ەركەكتەرمەن كەزدەسە الاتىن مۇمكىندىك بارىن ەسكەرتەدى.
توقال قىز ودان بولەك وزگە ەركەكتەمەن جاسىرىن كەزدەسىپ تۇراتىنىن ايتادى. ال، مۇنىڭ دۇرىس ەمەستىگىن تۇسىندىرگىسى كەلەتىندەردىڭ ءسوزىن ەلەگىسى دە كەلمەيدى.
