الماتىدا جانارماي قۇيۋ بەكەتىنە قاراقشىلىق شابۋىل جاساعاندار ۇستالدى

الماتى. قازاقپارات - الماتىدا جانارماي قۇيۋ بەكەتىنە قاراقشىلىق شابۋىل جاساعان جاس ازاماتتار ۇستالدى. بۇل تۋرالى بۇگىن الماتى قالالىق ءى ءى د باسپا ءسوز قىزمەتىنەن حابارلادى.

الماتى قالاسىنىڭ جەتىسۋ اۋدانى ارقىلى وتەتىن سولتۇستىك اينالما جولى بويىندا ورنالاسقان جانار ماي قۇيۋ بەكەتتەرىنىڭ بىرىنە قاراقشىلىق شابۋىل تاڭعى ساعات 4.00 شاماسىندا جاسالعان.

 بەتپەردە كيگەن بەيتانىس ادامدار انىقتالماعان ۇلگىدەگى تاپانشا جانە پىشاقپەن قورقىتىپ، كاسسير قىزدى جانارماي ساتۋدان تۇسكەن اقشانى جانە ۇيالى تەلەفوندى بەرۋگە ماجبۇرلەگەن. تەرگەۋ ماتەريالدارىنا سايكەس، كەلتىرىلگەن زالال - 110 مىڭ تەڭگەنى قۇراعان.

«بۇل دەرەك ق ر قىلمىستىق كودەكسىنىڭ 192- بابىنىڭ 2- تارماعى بويىنشا سوتقا دەيىنگى تەرگەۋدىڭ ءبىرىڭعاي تىزىلىمىنە ەنگىزىلدى. قىلمىستىڭ بەتىن اشۋ ءۇشىن ارنايى تەرگەۋ- جەدەل توبى جاساقتالدى. ونىڭ قۇرامىنا اۋداندىق ىشكى ىستەر باسقارماسىنىڭ وپەراتيۆتىك قىزمەتكەرلەرى ەندى. كەشەندى ىزدەۋ شارالارىنىڭ ناتيجەسىندە قاراقشىلىق شابۋىل جاساعان دەگەن كۇدىكپەن الماتى وبلىسىنىڭ ىلە اۋدانىنداعى ەلدى مەكەندەردىڭ ءبىرىنىڭ 18 جاستاعى تۇرعىندارى ۇستالدى. قىلمىستىق ءىس بويىنشا زاتتاي ايعاقتار تاركىلەنىپ، سوتقا دەيىنگى ءوندىرىس ماتەريالارىنا تىركەلدى.

 انىقتالعانىنداي، قىلمىستى جاساۋ بارىسىندا قاسكۇنەمدەر رەسمي تىركەلمەگەن جاراقاتتاۋشى تاپانشامەن قارۋلانعان بولىپ شىقتى» ، - دەدى الماتى قالالىق ءى ءى د كريمينالدى پوليتسيا باسقارماسىنىڭ باستىعى، پوليتسيا پودپولكوۆنيگى جاسۇلان بايكەنوۆ.

سونىمەن قاتار، بولىمشەدەگىلەر ق ر قىلمىستىق ءىس جۇرگىزۋ كودەكسىنىڭ 128- بابىندا كورسەتىلگەن ءتارتىپ بويىنشا ۇستالعانداردىڭ ۋاقىتشا تەرگەۋ اباقتىسىنا قامالعاندىعىن جەتكىزدى.

 ازىرگە الدىن الا دەرەكتەر بويىنشا، جاس ازاماتتاردىڭ وسى سەكىلدى باسقا دا قىلمىستارعا قاتىسى بولۋى مۇمكىن. قازىر، بۇل اقپارات مۇقيات تەكسەرىلىپ جاتىر.

  

اۆتور: ايبوتا جاپپاربەرگەن