بريتاندىق ۆەلوشاباندوز «تۋر دە فرانس» جانكۇيەرىنە قول جۇمسادى - كەسكىن

استانا. قازاقپارات - ۆەلوشاباندوز كريس فرۋم (Chris Froome) «تۋر دە فرانس» جارىسى كەزىندە وزىنە تىم جاقىن كەلگەن كولۋمبيا تۋىن ۇستاعان جانكۇيەردىڭ باسىنان ۇردى.

سپورتشىعا وسى ارەكەتى ءۇشىن 200 شۆەيتسار فرانكى كولەمىندە ايىپپۇل سالىندى (69 116 تەڭگە - ۇ ب باعامى بويىنشا).

فرۋم باسپا ءسوز ءماسليحاتىندا «كولۋمبيالىق جانكۇيەرلەرمەن ارازدىعى» جوقتىعىن مالىمدەدى. ول تۋ الىپ جۇگىرگەن جانكۇيەردىڭ ارەكەتى قاۋىپتى دەپ ءتۇسىندىردى. «جانكۇيەرلەرگە ايتارىم سپورتشىلارعا جاقىن كەلمەڭىزدەر. بۇل بىزگە عانا ەمەس ارتتا كەلە جاتقان ۆەلوشاباندوزدار ءۇشىن دە قاۋىپتى»، دەدى ول.

فرۋم تۋيتتەردە تۋ ۆەلوسيپەد دوڭگەلەگىنە وراتىلىپ قالا جازدادى دەپ جازدى.

ەسكە سالا كەتسەك، «تۋر دە فرانس» جارىسى 2- شىلدەدە باستالدى، ول 24- شىلدەدە پاريجدە مارەسىنە جەتەدى.