استانادا جاۋىنگەرلىك كۇرەسكە ارنالعان جيىن ءوتتى
عىلىمي فورۋمدى ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى جانە جاۋىنگەرلىك كۇرەس فەدەراتسياسى ۇيىمداستىردى، دەپ جازادى «ەگەمەن قازاقستان» باسىلىمى.
كونفەرەنتسيانىڭ ماقساتى - وسى ءتول سپورت ونەرىمىزدى جانداندىرۋ جانە دامىتۋ.
بۇل كۇرەس ءتۇرىنىڭ تاريحى تىم ەرتەدەن باستالادى. وعان تاستاعى تاڭبالار مەن سۋرەتتەر، فولكلورلىق-ەتنوگرافيالىق ماتەريالدار، جازباشا جانە ارحيۆ دەرەك كوزدەرى كۋا.
جاۋىنگەرلىك كۇرەس فەدەراتسياسىنىڭ پرەزيدەنتى حالىق قوجاحمەتوۆتىڭ ايتۋىنشا، كونفەرەنتسيادا كۇرەستىڭ وسى تۇرىنە قاتىستى كوپتەگەن ماسەلەلەر قارالدى. اتاپ ايتقاندا، «جاۋىنگەرلىك كۇرەس: كەشە، بۇگىن، ەرتەڭ»، «جاۋىنگەرلىك كۇرەستىڭ دامۋ تەورياسى، تاريحى» تاقىرىپتارىندا باياندامالار جاسالدى. وندا كۇرەستىڭ ەتنوگرافياسى، پەداگوگيكاسى، پسيحولوگياسى، فيلوسوفياسى، عىلىمي زەرتتەۋ بارىسى تۋرالى ماسەلەلەر ءسوز بولدى. جيىندا جاۋىنگەرلىك كۇرەستىڭ ەرەجەسىنىڭ دامۋى، كيىمى، تورەشىلىك جاساۋ، جارىستى ۇيىمداستىرۋ مەن وتكىزۋ ماسەلەلەرى دە كەڭىنەن تالقىلاندى. «قازىرگى كەزدە جاۋىنگەرلىك كۇرەستى دامىتۋدى قولعا الىپ جاتىرمىز. ونى ناسيحاتتاپ، ەلگە كورسەتىپ، تانىتۋ كەرەك. وسىعان بايلانىستى كۇرەستىڭ ادىستەمەسى، تەحنيكاسى، كۇرەستى دامىتۋداعى دەنە شىنىقتىرۋ جانە سپورت سالاسىنىڭ، جارنامالاۋدا بۇقارالىق اقپارات قۇرالدارىنىڭ ءرولى تۋرالى اڭگىمە قوزعالدى»، دەدى ول.
كونفەرەنتسيا جۇمىسىنا بەلگىلى عالىمدار، قوعام قايراتكەرلەرى، سپورتشىلار، ماگيسترانتتار مەن دوكتورانتتار، سونىمەن بىرگە اقپارات وكىلدەرى قاتىسادى.
