باتىرحان شۇكەنوۆتىڭ سوڭعى ارمانى ورىندالدى

استانا. قازاقپارات - «قازاقستان» ۇلتتىق تەلەارناسى استانا كۇنىنە وراي باتىرحان شۇكەنوۆتىڭ ورىنداۋىنداعى «جۇرەگىمدە استانا» اتتى ءاننىڭ كليپىنىڭ پرەمەراسىن وتكىزدى.

«قازاقستان ر ت ر ك» ا ق باسقارما ءتوراعاسىنىڭ ورىنباسارى قاينار ولجايدىڭ ايتۋىنشا، باتىرحان شۇكەنوۆتىڭ سوڭعى ارمانى - وسى انگە كليپ ءتۇسىرۋ بولعان ەكەن.

«كورپوراتسيا استانا كۇنىنە ارناپ، جىل سايىن ءبىر-ءبىر بەينەبايان ءتۇسىرۋدى قولعا العانبىز. بۇل 2013-جىلى باستالعان ءۇردىس بولاتىن. تەك قانا تاڭداۋلى، تەك قانا استاناعا ارنالعان ەڭ ۇزدىك شىعارماعا جىلىنا ءبىر-اق رەت بەينەبايان ءتۇسىرىپ كەلەمىز. ءبىرىنشى رەت رينات گايسيننىڭ «استانا - مەنىڭ ماقتانىشىم» اتتى مۋزىكالىق پرەمەراسىن ۇسىنعان بولاتىنبىز. ەكىنشى جىلى ايمان مۇساقوجايەۆانىڭ «انشىلەر اكادەمياسى» دەگەن تۋىندىسىنا كليپ تۇسىردىك. بيىلعى كليپتى ەرەكشە دارىن يەسى، قايتالانباس ءانشى، كەرەمەت ۇيىمداستىرۋشى، حالىقتىڭ سۇيىكتىسىنە اينالعان باتىرحان شۇكەنوۆتىڭ سوڭعى تۋىندىسىنا ارناۋدى ءجون كوردىك. ونىڭ سوڭعى ارمانى - وسى انگە كليپ ءتۇسىرۋ ەدى»، - دەيدى ق. ولجاي.

جالپى، بۇل ءان وتكەن جىلى باتىرحان شۇكەنوۆ اتىنداعى قوعامدىق قوردىڭ ارنايى شىعارعان «امانات» اتتى سوڭعى البومىنا كىرگەن. بەينەكليپ استانانىڭ ءتۇرلى ايماقتارىندا تۇسىرىلگەن جانە وندا ەلوردانىڭ ەڭ كورىكتى دەگەن جەرلەرى مەن ەڭ ءزاۋلىم عيماراتتارى كورىنىس تاپقان. وتاندىق كينەماتوگرافيا سالاسىندا العاش رەت ارنايى ەففەكتىلەردى جاساۋ ماقساتىندا انامورفوتتى كينووبەكتيۆتەر پايدالانىلعان. تۇسىرىلىمگە روزا رىمبايەۆا، مەدەۋ ارىنبايەۆ، ءمادينا ءسادۋاقاسوۆا، ماقپال يسابەكوۆا، مايرا مۇحامەد قىزى، ديلناز احماديەۆا، قاتىسقان.

ءاننىڭ ءسوزىن اقىن ءشومىشباي ساريەۆ جازسا، اۋەنى كومپوزيتور رەنات گايسيندىكى. بەينەبايان بۇگىننەن باستاپ تەلەارنالار مەن ينتەرنەت جەلىسىندە پايدا بولادى.

كەنجەكەي توقتامۇرات قىزى