قازاقستان بارىسىنا ىرىكتەلگەندەردىڭ باسىم بولىگى اۋىلدان شىققاندار - ا. شورايەۆ
قازاق كۇرەسى بوكس، كوركەم گيمناستيكا سەكىلدى سۋبەكتيۆتى سپورت تۇرىنە جاتادى. ياعني، تورەشىلەر فاكتورى مۇندا دا بار. سوندىقتان دا، ءبىز جىل سايىن وسى ادامي فاكتوردى الاستاتۋعا كۇش سالىپ كەلەمىز. ايتا كەتەرلىگى، بيىلعى جىلى «قازاقستان بارىسى» تۋرنيرى بويىنشا تورەشىلەرگە ەشقانداي دا شاعىم تۇسكەن جوق»، - دەدى ا. شورايەۆ.
بيىلعى تۋرنيردىڭ باس تورەشىسى بىلىكتى سپورتشى شالقار جولامانوۆ بولعان. ءسوز اراسىندا ا. شورايەۆ قازىلىق جاساعان تورەشىلەردىڭ بارلىعىنا ريزاشىلىعىن جەتكىزدى.
«ماعان ۇنايتىن، مەنىڭ كوڭىلىمنەن شىعاتىن كۇرەسشىلەرگە كەلسەك، ولار بار ارينە. ولار تۋرالى كوپ ايتقىم دا كەلمەيدى. دەگەنمەن، قازاق كۇرەسىنە قىزىعۋشىلىعى جوعارى ازاماتتاردىڭ قاتارى جىل سايىن ارتىپ كەلە جاتىر. مىسالى، بيىل داۋلەتحان جاقىپوۆتىڭ، ەلامان ەرعاليەۆتىڭ كۇرەسى قاتتى ۇنادى. ءبىز ءبىر كەزدەرى قازاق كۇرەسىن اۋىل جاستارى ءۇشىن الەۋمەتتىك ليفتكە اينالدىرۋ تۋرالى وزىمىزگە مىندەت قويىپ ەدىك. قۇدايعا شۇكىر، وسى ماقساتىمىز ورىندالىپ كەلەدى. ايتالىق، سوڭعى ەكى-ءۇش جىلدا تۋرنيرگە ىرىكتەلىپ جاتقان بالۋاندارىمىزدىڭ جارتىسىنان استامى اۋىلدان شىققان، تانىلماي جۇرگەن جاس ازاماتتاردان قۇرالىپ وتىر. ولاردىڭ ءوزى تۋرنيرگە العاش رەت قاتىسسا دا، جاقسى ناتيجەلەرگە قول جەتكىزىپ ءجۇر. وسى تۇرعىدان العاندا الداعى ۋاقىتتا بەيبىت سەكىلدى تاجىريبەلى جىگىتتەرگە بەلدەسۋ قيىنداي تۇسەدى دەپ ويلايمىن»، - دەدى ا. شورايەۆ.
ەسكە سالساق، جاقىندا استانادا وتكەن التىنشى «قازاقستان بارىسى-2016» رەسپۋبليكالىق ءتۋرنيرىنىڭ جەڭىمپازى بەيبىت ىستىبايەۆ اتانعان بولاتىن. بەيبىت ىستىبايەۆ وسىعان دەيىن 2012 جانە 2015 -جىلى «قازاقستان بارىسى» اتاعىنا قول جەتكىزگەن ەدى. تۋرنير جەڭىمپازى ب. ىستىبايەۆقا 25000000 تەڭگە، التىن تايتۇياق جانە استانادان ءبىر بولمەلى پاتەر بەرىلدى. ەكىنشى ورىن العان جۇمانازار ەرسۇلتانوۆقا 5500000 تەڭگە، ءۇشىنشى ورىن العان ايبول ايتبەككە 1800000 تەڭگە كولەمىندە سىيلىق تابىستالدى.
اۆتور: قانات مامەتقازى ۇلى
